Երեկ Հեռուստատեսության և ռադիոյի հանձնաժողովը հայտարարություն է տարածել, որում իր մտահոգությունն է հայտնել «Կենտրոն» հեռուստաընկերության կողմից հետընտրական շրջանում իրականացվող խմբագրական և եթերային քաղաքականության որոշ դրսևորումների կապակցությամբ: Հանձնաժողովի կողմից իրականացվող մշտադիտարկման տվյալները նաև ցույց են տալիս, որ վտանգված է օրենսդրությամբ երաշխավորված՝ «Կենտրոն» հեռուստաընկերության խմբագրական անկախության և ազատ գործելու իրավունքը, ակներև զգացվում են քաղաքական մեկ ուժի և նրա ղեկավարի միջամտությունն ու թելադրանքը:
«Առաջին լրատվական»-ը ՀՌՀ նախագահի ժամանակավոր պաշտոնակատար Տիգրան Հակոբյանից հետաքրքրվեց՝ եթե հանձնաժողովի կոչն անտեսվի, ի՞նչ է լինելու հետո, ի՞նչ ընթացակարգեր ունի ՀՌՀ-ն։
«Չեն կարող անտեսվել ՀՌՀ կողմից ընդունված վարչական ակտերը, որոնք պարտադիր են կատարման համար: Իսկ մենք ընդունել ենք ընդամենը հայտարարություն, որը արտահայտում է Հանձնաժողովի՝ եթերային լրատվամիջոցների գործունեությունը կարգավորող անկախ պետական մարմնի մտահոգությունը «Կենտրոն» հեռուստաընկերության վերջին շաբաթվա տեղեկատվական հաղորդումների ծայրահեղ կողմնակալ բովանդակությամբ: Ուստի մեր կոչը կարող է նաև անտեսվել:
Խնդիրն այն է, որ «Հեռուստատեսության և ռադիոյի մասին» ՀՀ օրենքը չի նախատեսում որևէ հետևանք, այդ թվում՝ պատժամիջոց (ինչպես մի շարք եվրոպական երկրներում) հեռուստառադիոընկերությունների տեղեկատվական հաղորդումների անաչառության, քաղաքական և գաղափարական բազմազանության կանոնների խախտման համար: Համեմատության համար նշեմ, որ, օրինակ, երկու օր առաջ Մեծ Բրիտանիայի կարգավորող մարմինը՝ Ofcom-ը, համարեց, որ այդ երկրում հեռարձակվող հեռուստաընկերություններից մեկն իր լրատվական ծրագրերում խախտել է անաչառության սկզբունքը, և այդ որոշմանը կարող են հետևել խիստ պատժամիջոցները՝ ընդհուպ մինչև շատ խոշոր տուգանք կամ հեռուստաընկերության հեռարձակման արտոնագրից զրկում:
Ինչպես տեսնում եք, Հայաստանում օրենքն ավելի «փափուկ» է, և ցանկալի է, որ մեզ մոտ գործեն հեռուստատեսությունների ինքնակառավարման և ինքնակարգավորման մեխանիզմները: Հուսով եմ, որ «Կենտրոն»-ը չի անտեսի Հանձնաժողովի հորդորը, ավելի զուսպ և անաչառ տեղեկատվական քաղաքականություն կվարի:
Նշեմ նաև, որ արգելված է կուսակցությունների կողմից հեռուստառադիոընկերությունների թե՛ ստվերային ֆինանսավորումը, թե՛ կուսակցական միջամտությունը խմբագրական և կադրային հարցերին: Այդպիսի դրսևորումները արդեն լուրջ իրավական հետևանքներ կարող են ունենալ վերգետնյա հեռարձակողների համար՝ ընդհուպ մինչև արտոնագրից զրկում: Եվ Հանձնաժողովը հուսով է, որ ինչպես «Կենտրոն»-ը, այնպես էլ այլ էլեկտրոնային լրատվամիջոցներ կպահպանեն իրենց ազատությունն ու անկախությունը»,- ասաց Տիգրան Հակոբյանը:
