Երևանի ընդհանուր իրավասության դատարանը գեներալ Մանվել Գրիգորյանի կալանքի վերաբերյալ որոշումը կհրապարակի այսօր: Մանվել Գրիգորյանի փաստաբան Արսեն Մկրտչյանը լրագրողներին ասաց, որ դատարանը հեռացել է խորհրդակցության սենյակ:
Փաստաբանը որոշ մանրամասներ հայտնեց այսօրվա դատական նիստից: Նա նախ ասաց, որ դատարանում այսօր Մանվել Գրիգորյանը հայտարարությամբ է հանդես եկել: «Նա հանդես եկավ մոտավորապես այն առաջին տեսաձայնագրությունը, որ հրապարակել էի, այդ ոճի ներքո: Նոր բան չկար, պարզ է, որ որ մեղքը չի ընդունում, բայց ասաց՝ եթե կան արարքներ, որոնք ինքը չի կատարել, բայց մեղսագրվում են իրեն, նաև արարքներ, որոնց մեջ մեղադրվել են ընտանիքի անդամները, Մանվել Գրիգորյանը հատարարեց, որ պատրաաստ է նաև դրա համար պատասխանատվություն կրի»,- ասաց փաստաբանը: Նա տեղեկացրեց, որ դատական նիստի ընթացքում Մանվել Գրիգորյանի ինքնազգացողութունը վատացել է, շտապ օգնություն են կանչել:
Ասաց, որ շաքարի ցուցանիշը 20.6 էր, բայց շտապ օգնության բժիշկները որևէ լուրջ օգնություն չցուցաբերեցին: «Ինձ համար դա արտառոց չէր, մարդը վեց ամիս գտնվել է փակ տարածքում, և մեքենայով տեղաշարժելը, բերելը ծանր հիվանդին, մանավանդ երկար ժամանակ ռեժիմով դեղը, սնունդը չստանալը պետք է բերեր այս վատացմանը: Ընդմիջում հայտարարվեց, անհրաժեշտ սնունդը հասցվեց, մարդն ստացավ դեղորայքը, առողջությունը վերականգնվեց»,- ասաց նա:
Փաստաբանն այսօրվա նիստում Մանվել Գրիգորյանի խափանման միջոց կալանքը փոխելու համար 20 մլն դրամ գրավ է առաջարկել: Ասաց, որ այդ սահմանաչափը դատարանը կարող է ավելացնել, բայց Գրիգորյանի ընտանիքը փող չունի:
«Այս փուլում Մանվել Գրիգորյանի և իր ընտանիքի անդամների ողջ գույքն արգելանքի տակ է, բայց Մանել Գրիգորյանն ազատամարտի հերոս է, այդ ճանապարհն անցնելուց ձեռք են բերում ոչ միայն թշնամիներ, կան նաև հարազատներ, մարտական ընկերներ, որոնք իրենց համեստ լուման կներդնեն: Մանվել Գրիգորյանը օլիգարխ չէ, նրա դուխն ու խիզախությունը շփոթել են ուրիշների մեծ ունեցվածքի հետ: Եվ այն դեպքում, երբ շրջանառվող տեսակետ կար, որ գրավի ընդունելի չափը 50 կամ 100 միլիոնն է, կամ ավելի մեծ գումարը, այստեղ իրատեսական գրավ է առաջարկվել, որը ըստ նախնական քննարկումների՝ հնարավոր է, որ այդ խողովակներով գա»,- ասաց Մկրտչյանը:
Փաստաբանը նաև հավելեց, որ Մանվել Գրիգորյանի նկատմամբ կանխակալ վերաբերմունք է, եթե չլիներ այդ վերաբերմունքը, հիմա Գրիգորյանը կալանքի տակ չէր լինի, այնպես, ինչպես կալանքի տակ չեն նմանատիպ հոդվածներով մեղադրվող անձինք:
