Ռուսական РБК-ի փոխանցմամբ՝ Վրաստանի նախկին նախագահ Էդուարդ Շևարդնաձեն խելամիտ է անվանել Կովկասի հարցերով վրացի փորձագետ Մամուկա Արեշիձեի՝ Աբխազիայի անկախության ճանաչման առաջարկը.
«Եթե Ռուսաստանն իր զորքերը դուրս բերի Աբխազիայից, ապա Վրաստանը կարող է առանց միջնորդների բանակցություններ սկսել նրա հետ։ Աբխազիան այլևս երբեք չի լինի Վրաստանի սովորական շրջան, և այն կորստյան կմատնվի որպես միացյալ պետության մաս։ Երկու հանրապետությունների ժողովուրդները հնարավորություն ունեն հասնելու համատեղ խաղաղ կյանքի։
Չի բացառվում, որ Արեշիձեի առաջարկը հիմք հանդիսանա փախստականների վերադարձի համար, ինչին կպահանջվի 10-15 տարի»։
Հիշեցնենք, որ իր վերոնշյալ առաջարկը Մամուկա Արեշիձեն պատճառաբանել էր նրանով, որ պաշտոնական Թբիլիսին պետք է Աբխազիայի նկատմամբ այնպիսի քայլեր իրականացնի, որոնք Աբխազիային կհեռացնեն Ռուսաստանից.
«Աբխազիայում տիրող իրավիճակը լավատեսության ոչ մի հիմք չի տալիս։ Աբխազները գտնվում են Աբխազիայից վտարվելու և անհետանալու վտանգի տակ։ Աբխազներին պետք է փրկել ձուլումից։ Մենք պետք է հատուկ միջոցներ ձեռնարկենք ոչ թե Աբխազիան, այլ աբխազներին վերադարձնելու ուղղությամբ՝ ծայրահեղ դեպքում նրա համար, որպեսզի կանգնեցնենք նրանց ասիմիլացումը հենց Աբխազիայի տարածքում։
Վրաստանը պետք է Աբխազիայի անկախությունը ճանաչի որոշակի նախապայմաններով, ինչպիսին է, ասենք, փախստականների վերադարձը։ Մենք պետք է այնպիսի անսպասելի քայլ կատարենք, որը կզինաթափի մրցակցին, այսինքն՝ որոշակի սեպ կխրի նրա և աբխազների միջև։ Եթե ինձանից կախված լիներ, ապա ես հենց այսօր անկախություն կտրամադրեի Աբխազիային»։
