«Իմ քայլը» դաշինքի պատգամավորության թեկնածու, փաստաբան Նիկոլայ Բաղդասարյանը իշխանական թեկնածուի կողմից վարչական ռեսուրսի չարաշահման որևէ դրսևորում չի տեսնում։ Նա փաստեր է պահանջում իրենց դրանում մեղադրող Հանրապետականից։ «Վարչական ռեսուրսի չարաշահման որևէ դրսևորում չկա։ Եվ հետո՝ ամենակարևորն այն է, որ մենք ապահովել ենք քաղաքացու ազատ կամքը՝ գնալ ընտրության և քվեարկել»,- «Առաջին լրատվական»-ի հետ զրույցում ասաց Բաղդասարյանը։
Վերջինս մտահոգիչ չի համարում նաև վարչապետի պաշտոնակատարի կոշտ հռետորաբանությունը։ «Եթե ես լինեի վարչապետ, ավելի կոշտ կլինեի։ Դա է իրականությունը։ Հռետորաբանությունը պետք է կոշտ լինի։ Մենք ապրում ենք մի ժամանակաշրջանում, երբ ավտորիտարիզմից անցում ենք կատարում դեպի ժողովրդավարական ռեժիմ, իսկ ավտորիտար ռեժիմի ներկայացուցիչները մի անկյունում գտնվելով՝ փորձում են ամեն կերպ խոչընդոտել դեպի ժողովրդավարություն գնալու մեր ջանքերը։ Իրենք հիմա ամեն ինչի պատրաստ են իրենց իշխանությունը չկորցնելու համար։ Իրենց հին մեթոդներով, կեղտոտ քայլերով փորձում են դիմել ստոր քայլերի։ Նրանք չընկալեցին վարչապետի՝ բարիկադներ քանդելու, հարաբերոթյուններ կառուցելու հորդորը։ Դրա համար էլ ասում եմ, որ ես վարչապետի փոխարեն ավելի կոշտ կլինեի, և փառք ու պատիվ Փաշինյանին, որ կարողանում է զսպել իրեն ու չգնալ ավելի սուր, ծայրահեղ քայլերի»,- ասաց Բաղդասարյանը։
Նիկոլայ Բաղդասարյանը զարմանում է նաև իրենց ցուցակը քննադատողներին, թե իբր քաղաքական ցուցակ չունեն: «Իսկ իրենց դեմքերից ո՞վ է քաղաքականացված՝ Արփինե Հովհաննիսյա՞նն է քաղաքական դեմք։ Իրենց ընտրած համակա՞րգն էր քաղաքական, մարդկանց ընտրակաշառքով ընտրության տանելու գործընթա՞ցն էր քաղաքական»,- ասաց մեր զրուցակիցը։
Անդրադառնալով ծրագրային դրույթներին՝ Բաղդասարյանը նշեց, որ իրենք հատուկ ուշադրություն են դարձրել իրավական ոլորտին, շարունակում են պնդել, որ դատաիրավական ոլորտի առողջացման համար անհրաժեշտ է անցումային արդարադատության գործիքակազմի ներդրումը, հակակոռուպցիոն, անկախ ունիվերսալ մարմնի ստեղծումը, որի ուղղությամբ տարվող ջանքերը խորհրդարանական ընտրություններից հետո կկրկնապատկվեն, քանի որ օրենսդրական դաշտում փոփոխություններ կատարելը կդառնա ավելի հեշտ։
Առավել մանրամասն՝ տեսանյութում:
