Ազատամարտիկ, պահեստազորի գնդապետ Վոլոդյա Ավետիսյանի որդուն՝ Ավետիս Ավետիսյանին բանակ զորակոչելու հարցը դեռևս լուծված չէ: Ինչպես մեզ փոխանցեց Վոլոդյա Ավետիսյանի մարտական ընկեր, «Խաչակիր» ՀԿ նախագահ Գագիկ Սարուխանյանը, այժմ Ավետիս Ավետիսյանը անցնում է կրկնակի բուժզննում, ինչի արդյունքում կպարզվի՝ նա կզորակոչվի՞ բանակ, թե՞ ոչ:
Գագիկ Սարուխանյանը մեզ տեղեկացրեց, որ տղան ունի վահանաձև գեղձի և սրտի հետ կապված խնդիրներ: Առաջին անգամ՝ 2012 թվականին, զինվորական բժշկական հանձնաժողովը մեկ տարով տարկետում է հատկացրել, հաջորդ տարի ևս՝ նույն պատճառով, սակայն այս տարի բժշկական հանձնաժողովը որոշել է, որ Ավետիսն առողջ է և պատրաստ՝ ծառայելու: Նա մեզ փոխանցեց, որ Ավետիսը կրկնակի բուժզննումն անցնում է «Արմենիա» հանրապետական բժշկական կենտրոնում: Ամենօրյա ստուգումների արդյունքը պարզ կլինի վաղը:
Գագիկ Սարուխանյանի համոզմամբ՝ Վոլոդյա Ավետիսյանի որդու զորակոչման հարցը կապված է նրա պայքարի հետ. «Առաջին հայացքից, իմ կարծիքով, սա հաշվեհարդար է, բայց, այնուամենայնիվ, ես կցանկանայի սպասել բժշկական եզրակացության ավարտին»:
Նա նաև ասաց, որ բժշկական եզրակացության արդյունքները ինքը տանելու է այլ մասնագետների մոտ, որպեսզի ամբողջությամբ պարզ լինի՝ Ավետիս Ավետիսյանը կարո՞ղ է ծառայել, թե՞ ոչ:
Ինչպես Վոլոդյա Ավետիսյանի դեպքում, այս անգամ ևս ազատամարտիկները պատրաստվում են գործողությունների դիմել և թույլ չտալ, որպեսզի հոր հաշվեհարդարը լուծեն որդուց:
Բացի այդ, մենք տեղեկացանք, որ Ավետիս Ավետիսյանի վիճակը վերջին երկու տարիներին չի փոխվել, նա շարունակում է դեղեր ընդունել, ալերգիկ է ինչպես դեղերի, այնպես էլ սննդամթերքի նկատմամբ:
