Հյուսիսային պողոտայի նախկին բնակիչները ամեն հինգշաբթի կառավարության մոտ իրենց բողոքի ձայնն են բարձրացնում՝ պահանջելով կորցրած բնակարանները:
Բուզանդի 9 հասցեի նախկին բնակիչ Քնարիկ Առաքելյանն «Առաջին լրատվական»-ի հետ զրույցում ասաց, որ տասը տարի է՝ ամեն հինգշաբթի անձրևին, ցրտին, շոգին այստեղ կանգնած են՝ մինչև իրենց բնակարանների հարցերը կլուծվեն:
«Մենք 25 հոգի ենք: Մենք այլևս չենք կարողանում: Գիտե՞ս ինչքան նամակ, դիմում ենք գրել: Թերթերը մինչև հիմա էլ լուսաբանում են»,- ասաց նա՝ հավելելով, որ նախագահը 4-5 տարի առաջ խոստացավ հարցերը լուծել, բայց չլուծեց:
Նա նաև նշեց, որ բոլոր ակցիաներին մասնակցում է. «Ես միշտ Ազատության հրապարակում եմ: Ես միշտ չեմ ուզում սրանց երեսը տեսնել, թեկուզ եթե իմ գործն էլ անեն, միևնույն է, ես չեմ ուզում սրանց տեսնել: Ես ուզում եմ նոր իշխանություն, որ ժողովրդի մասին կմտածի, ոչ թե ալան-թալան կանի»:
«Հարյուր միլիոնի պատճառով գույքը պարտքի դիմաց տվեցին Ռուսաստանին, ուրեմն ոչ մեկը չունեի՞ն այդ 100 միլիոնը, հավաքեին-տային: Քանդեցին երկիրը, Հայաստանը կործանվեց, Հայաստան չկա: Հոկտեմբերի 27 արին, մարսեցին, Մարտի մեկ արեցին, մարսեցին…»,- հավելեց Քնարիկ Առաքելյանը:
Լալայանց 5 հասցեի նախկին բնակիչուհի Ջուլիետա Ասատրյանն էլ նշեց, որ ուսանող թոռնիկ ունի, որը հեղափոխական է դարձել:
«Մինչև տեղացի մարդ չկառավարի, որ սիրտը իր քաղաքի համար ցավի, մենք այս վիճակից դուրս չենք գա»,- ասաց նա:
Նա անդրադարձավ նաև Սերժ Սարգսյանի երիտասարդանալու թեմային. «Ուրիշ մտածելու բան չունի՝ գնացել է 20 տարով երիտասարդացել. 10-40 հազար եվրո արժի այդ սրսկումը: Հո չի՞ խնայում ժողովրդի պես. մեր թոշակը դրա համար 4 հազար դրամով ավելացրեց»,- հավելեց նա:
