Грузия Online-ի փոխանցմամբ՝ Վրաստանի փոխարտգործնախարար Նինո Կալանդաձեն այսօր հայտարարել է, որ պաշտոնական Թբիլիսին մինչև Վրաստանի օկուպացված տարածքներում իրավիճակի շտկումը որևէ իմաստ չի տեսնում Ժնևյան բանակցային ձևաչափի շարունակման մեջ.
«Վրացական կողմը մտահոգ է Աբխազիայում և Հարավային Օսիայում օկուպացիոն ուժերի ավելացումից և այդ տարածքներում ահաբեկչությունների նախապատրաստումից, որի արմատախիլ արվելու կարիքը միանշանակ կա։
Մինչև տվյալ խնդրի լուծումը մենք անիմաստ ենք համարում Ժնևյան բանակցային ձևաչափին մասնակցելը։ Այս պլանում վրացական կողմն ակնկալում է, որ միջազգային հանրությունը կարձագանքի դրան և ճնշում կգործադրի Ռուսաստանի վրա»։
Հիշեցնենք, որ Ռուսաստանը մտադիր է 2.5 անգամ ավելացնել Աբխազիայում ունեցած իր ռազմական կոնտինգենտը։ Ներկայումս Ռուսաստանն Աբխազիայում ունի 1500 զինծառայող։ Ընդ որում, սա միայն Աբխազիայի ռուսական բազաներում գտնվողներն են։
Պլանավորված է մինչև 2013 թվականը նրանց թիվը հասցնել 3500-ի։ Ռուսական կողմը դա պատճառաբանում է 2014 թվականին Սոչիում կայանալիք Ձմեռային օլիմպիական խաղերի անվտանգության ապահովման անհրաժեշտությամբ։
