Դեկտեմբերի 9-ին կայանալիք արտահերթ խորհրդարանական ընտրություններին հավակնում են մասնակցել 11 քաղաքական ուժ՝ 9 կուսակցություն, 2 դաշինք:
«Առաջին լրատվական»- ի հետ զրույցում «Լուսավոր Հայաստան» կուսակցության համամասնական ցուցակում 5-րդ համարն զբաղեցրած փաստաբան Տարոն Սիմոնյանը, անդրադառնալով հարցին, թե ինչու է որոշում կայացրել մասնակցել ընտրություններին, նշեց, որ իրավաբաններն ուղղակիորեն քաղաքականությամբ չեն զբաղվում, բայց նրանց գործունեությունը կապված է պետականաշինության հետ. «Եկել է ժամանակը, իմ ներսում անհրաժեշտություն է առաջացել պետականաշինությանն անուղղակի մասնակցելու փոխարեն ուղղակիորեն մասնակցել: Սոցիալ-քաղաքական և պետաիրավական զարգացումները տանում են այն ուղղությամբ, որ ով որոշակի ոլորտում հասել է հաջողության և ունի երկիրը ավելի լավը դարձնելու կարողություններ, պետք է դրանք ներդնի քաղաքական համակարգի զարգացման համար»:
Տ. Սիմոնյանի կարծիքով՝ միայն հեղափոխությամբ երջանկանալը բավարար չէ, անհրաժեշտ է քաղաքական իշխանության հավասարակշռության ճիշտ մեթոդաբանության կիրառում. «Այս փուլում իշխանությանը հակակշռելու հնարավորություն պետք է ունենա այն քաղաքական ուժը, որը ինչ-որ առումով մասնակցություն է ունեցել հեղափոխության իրականացմանը, կիսում է հեղափոխության արժեհամակարգը, սակայն հեղափոխության նպատակների իրագործման մեթոդների մեջ տարբերություններ ունի. նպատակները նույնն են, դրանց հասնելու ճանապարհներն ու մեթոդներն են տարբեր: ԼՀԿ-ն լինելու է իշխանության իրական հակակշիռը»:
Տ.Սիմոնյանի դիտարկմամբ՝ ընդդիմություն լինելը կարգավիճակ չէ և ինքնանպատակ չէ. ընդդիմություն լինելը գործառույթ է: «Մեր նպատակը մեր պետության զարգացումը և ազգային շահի պաշտպանությունն է»,- նշեց փաստաբանը:
Մանրամասն՝ տեսանյութում:
