Պետական պահպանության ծառայության պետի նախկին առաջին տեղակալ, նախկին նախագահ Սերժ Սարգսյանի թիկնազորի նախկին պետ Վաչիկ Ղազարյանը՝ Սերժի Վաչոն, երեկ կրկին կալանավորվել է. Վճռաբեկ դատարանը բավարարել է Գլխավոր դատախազի տեղակալի բողոքը և ուժի մեջ թողել Ղազարյանին կալանավորելու որոշումը։
Ապրիլյան հեղափոխությունից հետո կալանավորված Ղազարյանին մեղադրանք էր առաջադրվել Բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր ունեցած դրամական միջոցների իրական չափի մասին հայտարարագրման ենթակա տվյալները թաքցնելու, ինչպես նաև ապօրինի հարստանալու համար: Սերժ Սարգսյանի թիկնազորի պետը կալանավորվել էր երկու ամսով և, համաձայն չլինելով դատարանի որոշմանը, այն բողոքարկել էր Վերաքննիչ ատյան և ազատ արձակվել 1 միլիարդ դրամ գրավի դիմաց։
Ղազարյանի դեմ հարուցված գործը, ըստ էության, առաջինն էր Հայաստանում ապօրինի հարստացման հոդվածով:
Ըստ ՀՔԾ-ի՝ Ղազարյանը չի հայտարարագրել 1 միլիոն 272 հազար 900 դոլար, 218 հազար եվրո և 460 միլիոն դրամի գույք: Սակայն Սերժի Վաչոյի գործն ուշագրավ էր այլ առումով ևս. Հայաստանի դատական պրակտիկայում դեռ երբեք չէր կիրառվել գրավի նման աննախադեպ չափ՝ մեկ միլիարդ դրամ, ինչը չափազանց մեծ գումար է անգամ նախկին բարձրաստիճան պաշտոնյաների համար։ Իհարկե, որևէ մեկը չի կասկածում, որ Վաչիկ Ղազարյանը ու նրա «էլիտար» շրջապատը տիրապետում են ահռելի հարստության, ու նրանց համար խնդիր չէ այդ մեկ միլիարդի վճարումը։
Ամբողջ խնդիրն այն էր, թե ամռանը ով է հայտնվելու ապօրինի հարստացման հաջորդ թիրախի կարգավիճակում՝ վճարելով Սերժի Վաչոյի համար։ Սակայն Սերժ Սարգսյանի շրջապատը, ըստ ամենայնի, գտավ օպտիմալ լուծում. համենայնդեպս՝ երրորդ նախագահի համհարզի համար, ըստ պաշտոնական տեղեկատվության, վճարել էին դրսից։
Սերժի Վաչոյի հետ կապված պատմությունը, մեկ միլիարդ դրամ գրավով նրա ազատ արձակումը որոշակի նստվածք թողեց հասարակության մեջ։ Մարդիկ սկսեցին խոսել, թե ինչ-որ ստվերային պայմանավորվածություններ կան Նիկոլ Փաշինյանի ու Սերժ Սարգսյանի միջև, կամ՝ այն մասին, որ մեծ գումարով կարելի է գնել ազատություն, եթե անգամ մարդը մեղադրվում է մեծ հանցագործություն կատարելու մեջ։ Մարդկանց չի հետաքրքրում այն կարևոր հարցը, որ դատական համակարգը տակավին իր վրա չի զգացել հեղափոխական փոփոխությունների շունչը։
Ինչևէ, Սերժի Վաչոն երեկ կրկին կալանավորվեց, ու Վճռաբեկ դատարանի այդ որոշումը սկզբունքային է մի քանի, առաջին հերթին՝ միֆեր կոտրելու տեսանկյունից։ Նոր Հայաստանում այլևս որոշիչ չեն մեծ փողերը կամ ազդեցիկ կապերը, եթե մարդը կասկածվում է կոնկրետ հանցագործության կատարման մեջ։ Այլևս հնարավոր չէ փողով կամ դիրքով «անձեռնմխելիություն» գնել։ Սա սկզբունքային արձանագրում է, որը պետք է ամրապնդվի մարդկանց գիտակցության մեջ՝ խորհրդանշելով հին ու նոր Հայաստանների սկզբունքային, էական տարբերությունը։
Չի կարող լինել ու չկա որևէ ստվերային պայմանավորվածություն Նիկոլ Փաշինյանի ու Սերժ Սարգսյանի միջև, որովհետև ցանկացած նման գործարք կլիներ հեղափոխության, նրա արժեքների կապիտալիզացիայի հաշվին։ Վաչիկ Ղազարյանը Սերժ Սարգսյանի շրջապատի ամենաառանցքային մարդկանցից մեկն է, ու նրան վերստին ազատությունից զրկելը կարևոր ուղերձ է, որ հեղափոխությունը որևէ հարցում չի կարող կոնսենսուս ձևավորել քրեաօլիգարխիայի հետ։
Մյուս կողմից՝ Սերժի Վաչոյի կալանավորումը, արդեն հաստատապես երկար ժամանակով, կարող է ազդակ հանդիսանալ նոր սկանդալին բացահայտումների համար, որովհետև նա եղել է երրորդ նախագահի, այսպես կոչված, «աչքն» ու «ականջը» ու նրա կատարած հանցագործությունների անմիջական վկան, եթե չասենք՝ կատարողն ու համակարգողը։ Բավական է նշել միայն այն փաստը, որ, ըստ հավաստի լուրերի, հենց Վաչիկ Ղազարյանն է վերահսկել Սերժ Սարգսյանի ստվերային ֆինանսական հոսքերի մի զգալի հատվածը։
