Եռաբլուրում Արմեն Հովհաննիսյանի հուղարկավորությունից հետո պաշտպանության նախարար Սեյրան Օհանյանը լրագրողների հետ զրույցում նշեց, որ հակառակորդի ոտնձգություններից հետո, դիվերսիոն հետախուզական խմբի ներթափանցման ժամանակ Արմեն Հովհաննիսյանը և նրա ընկերները՝ ջոկի անդամները, արժանի պատասխան են տվել: Հակառակորդը մի քանի զոհ է տվել և 25-ից ավելի վիրավորներ: Հարձակումը կատարել են երեք խմբով: Այդ խմբերը հետ են շպրտվել մեր դիրքերից, ընդ որում՝ դրանց կազմում են եղել հակառակորդի հատուկ նախապատրաստված ստորաբաժանումներ:
Նա նշեց, որ Արմենի կատարած սխրագործությունը պետք է պարտավորեցնի, որ առաջին հերթին մեր հայրենքի սահմանների պաշտպանության նկատմամբ չափազանց պատասխանատու լինենք, պատասխանատվությամբ լցվենք մեր գործերի նկատմամբ: «Արմենի օրինակը պետք է տարածվի, նրանով պետք է ոգեկոչվեն, նաև տոգորվեն, գոտեպնդվեն մեր բոլոր զինվորները՝ ավելի հանդուգն կերպով իրականացնելու իրենց առջև դրված պարտավորությունները»,- ասաց նախարարը:
Նա նաև տեղեկացրեց, որ շուրջ երկու օր է՝ լարվածությունը հասել է գագաթնակետին, հակառակորդի կողմից կրակոցները բազմաթիվ են: «Երբևցե այս քանակությամբ կրակոցներ չեն եղել, հասկանալի է, որ մտավախություն կա, որ պատասխաններ կլինեն, իսկ պատասխաններ անպայման կլինեն, մենք պահը կգտնենք»,- հավելեց նախարարը:
Սադրանքները, նրա խոսքով, ուղղված են մեր՝ բանակցային գործընթացում շեղումներ իրականացնելուն. «Այն հիմնական խնդիրը, որ մենք այսօր կատարում ենք, այն է՝ խաղաղ ճանապարհով և երկխոսության ճանապարհով ԼՂՀ հակամարտության հարցը լուծվի, կառուցողական մոտեցում չի ցուցաբերվում նրանց կողմից, և մշտապես սադրանքները լինում են ադրբեջանցիների կողմից: Որքան լինելու են՝ այդքան էլ դրանց պատասխան են տրվելու»:
