Ադրբեջանական ANS PRESS-ի փոխանցմամբ՝ Ադրբեջանի ռազմավարական պլանավորման կենտրոնի տնօրեն Ահմեդ Շիրինովն առաջարկում է ԵՄ-ի սկզբունքների հիման վրա ձևավորել նոր քաղաքական-տնտեսական միություն, որի կազմի մեջ կմտնեն Թուրքիան, Ադրբեջանը և Վրաստանը (TAG)։
Շիրինովի խոսքերով՝ TAG-ը ձևավորվելու է այն նույն սկզբունքների հիման վրա, որոնցով ձևավորվել է ԵՄ-ը. «Այսինքն՝ ստեղծվելու է միացյալ սոցիալական-տնտեսական տիրույթ՝ միացյալ արժույթով, առանց սահմանների ներքին վերահսկման, միացյալ մաքսային տիրույթով և այլն։ Այդ ամենը պահանջում է ստեղծել նաև միացյալ խորհրդարան, կառավարություն և այլ կոորդինացիոն կառույցներ։
Այս ծրագիրը բավական շահավետ է Ադրբեջանի համար։ Նախ դա կնշանակի տարածաշրջանում տեղի ունեցող զարգացումներից Հայաստանի քաղաքական-տնտեսական լիակատար շրջափակում։ Դրանով նաև Հայաստանը վերջնականապես կկտրվի իր հիմնական գործընկեր Ռուսաստանից։
Բանն այն է, որ Ադրբեջանն այդ միությունում կարող է առաջ քաշել Հայաստանի քաղաքացիների տեղաշարժը սահմանափակող պահանջներ»։
Հիշեցնենք, որ բավական երկար ժամանակ է, ինչ Թուրքիան ու Ադրբեջանը չեն կարողանում լուծել երկու երկրների միջև գործող անցագրային ռեժիմի վերացման խնդիրը։ Չգիտես ինչու, Շիրինովը «մոռանում» է այս խնդրի մասին և փոխարենը բարձրաձայնում լայնամասշտաբ և անիրականանալի նախագծի մասին։
