«Ազատության հրապարակում գտնվող մարդկանց թիվը մեր ակնկալածից շատ էր… հասարակությունը չի ընդունում այդ օրենքը, պատրաստ է պայքարել, և օր օրի այդ շարժումը նոր թափ է ստանում»,- «Առաջին լրատվական»-ի հետ զրույցում նշեց ՀՅԴ «Նիկոլ Աղբալյան» ուսանողական միության վարչության ատենապետ Գերասիմ Վարդանյանը՝ անդրադառնալով «Ընդդեմ պարտադիր կուտակային կենսաթոշակային համակարգի» քաղաքացիական նախաձեռնության իրականացրած հանրահավաքին:
Հարցին հնչում էին «Սերժիկ, հեռացի՛ր» կամ «Պայքա՛ր, պայքա՛ր մինչև մեջ» կարգախոսներ, դրանք որքանո՞վ էին համապատասխանում «Դեմ եմ պարտադիրին» նախաձեռնության կարգախոսներին, նա պատասխանեց, որ նման կոչեր հնչեցրել է ժողովուրդը, բեմահարթակին եղել են կուսակցություններ, նրանից ոչ մեկը նման կոչեր չի հնչեցրել. «Կոչեր արել է ժողովուրդը, դա ինքնաբուխ է, իսկ եթե նման կոչ անում է ժողովուրդը, ապա պետք է հետը հաշվի նստենք, ընդունենք»:
Ըստ Գ. Վարդանյանի՝ այս պայքարի հաջողությունը և ընթացքը պայմանավորված է գործողությունների համադրմամբ, տեղի է ունենում հասարակության և քաղաքական չորս կուսակցությունների մոբիլիզացիա, ինչը աննախադեպ է մեր երկրի քաղաքական կյանքում և մեծ ազդեցություն կարող է ունենալ հասարակության վրա:
Խնդիրը, նրա խոսքով, միայն օրենքում փոփոխությունների հասնելու մեջ չէ, այլ չորս կուսակցությունների համագործակցությունը գազի գնի հետ կապված, ընդհանրապես՝ կառավարության վարած քաղաքականության հետ կապված:
«Այս մոբիլիզացիան շատ ծանր հետևանքներ կարող է ունենալ ներկայիս իշխանության համար»»,- հավելեց մեր զրուցակիցը: Խնդիրը, նրա դիտարկմամբ, քաղաքականի և քաղաքացիականի միանալու մեջ չէ, այլ կառավարության վարած սոցիալական քաղաքականության մեջ, շարժումը սկսվել է հենց սկզբից քաղաքացիական հասարակության և չորս կուսակցությունների հետ համագործակցությամբ, և ինչ-որ մեկի դերը այստեղ չի կարելի գերագնահատել, մյուսի դերը՝ թերագնահատել, սա համատեղ աշխատանքի արդյունք է. «Եթե միայն լինեին նախաձեռնությունները, չէր կարելի միանշանակ ասել, որ այս արդյունքին կարելի էր հասնել, ինչպես նաև չէր կարելի ասել, որ եթե միայն կուսակցությունները լինեին, հնարավոր էր միանշանակ արդյունքի հասնել: Սա համադրման արդյունք է, և այս միասնականությունը պետք է պահենք և նորանոր հաջողություններ գրանցենք»:
Հարցին, թե համակարգի հետ սերտաճած կուսակցությունները որքանո՞վ են ազնիվ իրենց պահանջներում ու մղումներում, և ինքը որքանո՞վ է հավատում նրանց, Գերասիմ Վարդանյանը պատասխանեց, որ կա կոնկրետ իրավիճակ, կոնկրետ խնդիր, և կոնկրետ խնդրի շուրջ համախմբվել են խորհրդարանական ուժերը, քաղաքացիական նախաձեռնությունները, որոնք օր օրի աճում են, և դա պետք է գնահատել, փայփայել: Ըստ նրա՝ դա լուրջ վտանգ կարող է հանդիսանալ ներկայիս իշխանությունների և կառավարության համար:
Լուսանկարը՝ PanARMENIAN Photo-ի
