ԱՄՆ-ը պատրաստ է վերսկսել տարեկան 1.5 մլրդ դոլարի չափով Եգիպտոսի ֆինանսական օգնությունը: Նոր ուղղումները, որոնք Սպիտակ տան նախաձեռնությամբ ներկայացվել են Կոնգրեսին, թույլ են տալիս Կահիրեին փոխանցել ռազմական տեխնիկա և սպառազինություն: Դա կարվի միայն «ժողովրդավարական ուղու պահպանման» և իսրայելա-եգիպտական խաղաղ համաձայնագրերի անշեղ կատարման դիմաց: Այնուհանդերձ՝ նոր օրինագիծը, որն արդեն հավանության է արժանացվել Սենատի և Ներկայացուցիչների պալատի առանցքային կոմիտեների կողմից, արմատապես փոխում է օտարերկրյա պետություններին ամերիկյան օգնություն տրամադրելու կանոնները: Այս մասին հայտնում է Kommersant-ը:
Ամերիկյան օրենսդրությունն արգելում է ֆինանսական աջակցություն ցուցաբերել այն երկրներին, որտեղ ռազմական հեղաշրջում է եղել, և որտեղ իշխանության ղեկին է զինվորական կառավարությունը: Հենց այդ պատճառով էլ անցած տարվա հուլիսին իսլամիստ նախագահ Մուհամմադ Մուրսիի տապալումից հետո Վաշինգտոնը ստիպված եղավ դադարեցնել Կահիրեի օգնության ծրագիրը, որը գնահատվում էր տարեկան 1.5 մլրդ դոլար: Այդ գումարի մեծ մասը կազմել են եգիպտական բանակի ֆինանսավորման ծախսերը: Արգելքի տակ էին հայտնվել նաև ծանր տեխնիկայի և սպառազինությունների մատակարարումները:
Փորձագետների կարծիքով՝ Սպիտակ տան կողմից արված զիջման գլխավոր պատճառը Վաշինգտոնի իսրայելամետ լոբբին է: «Կահիրեում զինվորականներն իշխանության են եկել վաղուց: Այդ իսկ պատճառով գլխավոր հարց են դարձել իսրայելա-եգիպտական խաղաղ համաձայնագրերի կատարման երաշխիքները»,- ասել է Մերձավորարևելյան քաղաքականության վաշինգտոնյան ինստիտուտի փորձագետ Դևիդ Շենկերը:
Օգնության վերսկսման մասին օրինագիծը նախագահին պարտավորեցնում է ներկայացնել անհրաժեշտ աացույցներ առ այն, որ Եգիպտոսը նախկինի պես ԱՄՆ ռազմավարական գործընկերն է և կատարում է 1979 թվականի Իսրայելի հետ կնքված խաղաղ պայմանագրի բոլոր պայմանները: Դրանից հետո Կոնգրեսը վարչակազմին կտա Կահիրեին 250 մլն դոլար տրամադրելու իրավունք՝ որպես տնտեսական օգնություն: Եգիպտական զինված ուժերի պահման համար 1.3 մլն դոլարի չափով գումարները նախատեսվում է կիսել երկու տրանշի. 975 մլն դոլարը կտրամադրվի հանրաքվեի անցկացումից հետո, իսկ 576.8 մլն դոլարը՝ նախագահական և խորհրդարանական ընտրություններից հետո:
