Այսօր հրավիրված ասուլիսի ընթացքում ԱԺ «Ժառանգություն» խմբակցության պատգամավոր Արմեն Մարտիրոսյանը, անդրադառնալով Սերժ Սարգսյանի ստրասբուրգյան ելույթին, նշեց, որ առաջին հայացքից այն ժողովրդավար ելույթ էր, սակայն, ըստ նրա, այն պետք է բաժանել երկու մասի, թե ելույթը ում էր հասցեագրված, և հասցեատերը ինչ աչքերով դիտեց ելույթը. «Եվրոպայի լսարանի համար ելույթը հավասարակշռված էր, ղեկավարի խոսքը հիմնված էր արժեքային համակարգի վրա, այսինքն՝ եվրոպական լսարանի և Եվրոպայի դիտողի համար ելույթը շատ լավ էր, բայց մեր աչքերով այն այլ էր, և չէր համապատախանում Հայաստանում առկա իրավիճակին։ Ավելին՝ պահանջ չդրվեց Ղարաբաղը վերադարձնել բանակցային սեղանի շուրջ: Նախընտրական շրջանում խոսվեց Ընտրական օրենսգրքի մասին, որով ընտրությունները կանցնեն շատ ավելի լավ, քան նախորդները, սակայն ոչինչ չի արվում փակված հեռուստատեսություններին եթեր տրամադրելու համար»։ «Ժառանգության» պատգամավորը հույս հայտնեց, որ Սերժ Սարգսյանի ելույթի 10-20 տոկոսը կիրականա։
Դիտարկում արվեց, թե Զարուհի Փոստանջյանի հարցը՝ ուղղված Սերժ Սարգսյանին, երկու կարծիք է ձևավորել. նախ՝ որ չի կարելի երկրից դուրս նման հայտարարություններ անել, և մյուսը՝ այն էականորեն նպաստեց Սերժ Սարգսյանի փիառին և ցույց տվեց, թե նա դեմոկրատ է։ Սակայն Արմեն Մարտիրոսյանը երկու կարծիքն էլ չկիսեց՝ պատճառաբանելով, որ Զարուհի Փոստանջյանը ինչպես Հայաստանում էր իրեն դրսևորում, այնպես էլ՝ Եվրոպայում, հետևաբար նրա արարքի մեջ արտասովոր ոչինչ չկա, ապա ինքը հարց ուղղեց՝ ի՞նչ է, Մարտի 1-ը սպիտակ սավան չէր՝ Զարուհի Փոստանջյանի ելո՞ւյթն էր սպիտակ սավան դիտվում:
Ինչ վերաբերում է նրան՝ Կազանում փաստաթուղթ կստորագրվի՞, թե՞ ոչ, Արմեն Մարտիրոսյանը համոզմունք հայտնեց, որ նման պարագայում թե՛ Հայաստանի, թե՛ Արդրբեջանի հասարակությանը պետք է պատրաստեին փոխզիջումների, սակայն ներկա պահին ո՛չ Հայաստանում նման իրավիճակ կա, ո՛չ էլ Ադրբեջանում: Հետևաբար Մարտիրոսյանը կարծում է, որ մայնդորֆյան տիպի փաստաթուղթ կստորագրվի, ինչ վերաբերում է մադրիդյան սկզբունքների վավերացմանը և բեկումնային ճեղքումներին, ապա նման զարգացումներ նա չի տեսնում:
