Ինչպես արդեն գիտեք, երեկ ուշ երեկոյան ԵԱՀԿ Մինսկի խմբի համանախագահների միջնորդությամբ և մասնակցությամբ Նյու Յորքում տեղի է ունեցել Հայաստանի և Ադրբեջանի արտգործնախարարների հանդիպումը: Հայաստանի ԱԳՆ տարածած տեղեկատվությունը լակոնիկ է ու բովանդակային բաղադրիչով աչքի չի ընկնում։
Մասնավորապես, հայտնի է դառնում, որ հանդիպումը սկսվել է նախ ընդլայնված ձևաչափով, ապա արտգործնախարարներն առանձնազրույց են ունեցել։ Տեղի է ունեցել մտքերի օգտակար փոխանակում հիմնահարցի կարգավորման շուրջ՝ ուղղված տարածաշրջանում կայուն խաղաղության հաստատմանը։ Զրուցակիցները պայմանավորվել են շարունակել երկխոսությունը՝ ներառյալ առաջիկայում համանախագահների տարածաշրջան կատարելիք այցի շրջանակներում։ Նմանատիպ բովանդակությամբ հաղորդում է տարածել նաև ադրբեջանական կողմը։
Փորձենք վերծանել այն, ինչը սովորաբար դիվանագիտական արտահայտությունների տողատակում է մնում. «Առաջին լրատվական»- ի հետ քննարկմանը մասնակցեցին քաղաքագետներ Լաուրա Բաղդասարյանը և Ստեփան Գրիգորյանը:
Լաուրա Բաղդասարյանի կարծիքով՝ Հայաստանի և Ադրբեջանի փոխնախարարների հանդիպումը պայմանավորված չէր նրանով, թե Հայաստանի վարչապետն ինչ կասեր Ղարաբաղի մասին Նյու Յորքում. հակամարտող երկրների արտգործնախարարների հանդիպումը նախապես պլանավորված էր:
«Փաշինյանի հայտարարությունը նորություն չէր. Ստեփանակերտում նա հայտարարել էր, որ ինքը ներկայացնում է Հայաստանի հանրությանը և ճիշտ կլինի, որ բանակցությունների ժամանակ Ղարաբաղի հանրության կարծիքը ներկայացնի Ղարաբաղի իշխանությունը, և Նյու Յորքի ամբիոնից նա կրկնեց այս հայտարարությունը»,- նշեց Բաղդասարյանը:
Ս. Գրիգորյանի դիտարկմամբ՝ այն, որ Մամեդյարով – Մնացականյան հանդիպումը երկար է տևել, դա դրական փաստ է, քանի որ նրանք 3 ժամվա ընթացքում կկարողանային քննարկել բոլոր հարցերը: «Քանի որ չի ասվում Փաշինյան-Ալիև հանդիպում կլինի, թե ոչ, նշանակում է, որ արտգործնախարարները ընդհանուր հայտարարի չեն եկել, բայց նրանց հայտարարություններից ակնհայտ է, որ նրանք համաձայել են նույնաբովանդակ հայտարարությամբ հանդես գալ. դա շանս է տալիս, որ երկխոսությունը կշարունակվի, բայց դա չպետք է շփոթել բանակցությունների հետ»,- նշեց քաղաքագետը:
Նրա դիտարկմամբ՝ նախկին իշխանությունները Արցախին որպես բանակցային կողմ ներգրավելու մասին խոսում էին ներքին լսարանի համար, իսկ Փաշինյանը դա արեց միջազգային լսարանի համար: «Այն, որ նա ՄԱԿ-ի ամբիոնից անդրադարձավ այդ խնդրին, նշանակում է, որ արդեն իսկ զբաղվում է այդ հարցով և ինչ-որ չափով պահանջում է Ադրբեջանից, որ Արցախը դառնա բանակցային կողմ»,- նշեց Ս. Գրիգորյանը: Լ. Բաղդասարյանը հավելեց, որ Ղարաբաղի կարգավիճակը Ղարաբաղի բնակչության անվտանգության խնդիրն է և կարևորեց Ղարաբաղի մասնակցությունը բանակցային գործընթացում:
Թավշյա հեղափոխությունը աշխարհում բարձրացրեց Հայաստանի վարկանիշը: Այս մասին ընդգծեց Ս. Ստեփանյանը: Քաղաքագետի խոսքով՝ Ադրբեջանում հասկանում են, որ Հայաստանի դեմ սադրանք հրահրելն արդեն անհնար է: Լ. Բաղդասարյանը հավելեց, որ Բաքվի հակահայկական հայտարարությունները մեծ վտանգ չեն ներկայացնում:
Մանրամասն՝ տեսանյութում:
