Նոր Օռլեանի հինգերորդ շրջանի վերաքննիչ դատարանը հաստատել է ավելի վաղ շրջանային դատավոր Կառլ Բարբյեի կայացրած վճիռը, ըստ որի BP բրիտանական կորպորացիան պետք է շարունակի փոխհատուցում վճարել 2010թ. Մեքսիկական ծոց նավթի արտահոսման կապակցությամբ: Այս մասին հաղորդում է ITAR-TASS-ը` վկայակոչելով դատարանի հրապարակած փաստաթղթերը:
BP-ի փաստաբանները փորձում էին կասեցնել Բարբյեի վճիռը: Նրանք պնդում էին, որ վերջինս սխալ է մեկնաբանել 2012թ. ընկերության և էկոլոգիական աղետի հետևանքով վնաս կրած ընկերությունների և մասնավոր անձանց միջև ձեռք բերված համաձայնագիրը: Այս կապակցությամբ ընկերության ներկայացուցիչների խոսքերով` BP-ն ստիպված է եղել փոխհատուցում վճարել այն դեպքերում, երբ ոչ մի վնաս իրականում չի պատճառվել:
Վերաքննիչ դատարանը, սակայն, Բարբյեի կայացրած վճիռը համարել արդար:
Ավել վաղ BP-ն փոխհատուցման հիմնադրամի չափը գնահատել էր 7.8 միլիարդ դոլար, սակայն այժմ այն գերազանցում է 9.2 միլիարդը:
2010թ. ապրիլին Մեքսիկական ծոցում` Deepwater Horizon հարթակում, որտեղ BP-ն հորատման աշխատանքներ էր իրականացնում, պայթյուն է տեղի ունեցել, որի հետևանքով զոհվել է 11 մարդ: Արտահոսքը հաջողվել է կանգնեցնել միայն երեք ամիս անց, երբ ծոց էր թափվել արդեն 4.9 միլիոն բարել նավթ:
