Մեծ Բրիտանիայի ոստիկանությունը սեպտեմբերի 5-ին հանդես է եկել հայտարարությամբ՝ գաղտնազերծելով ռուսական հետախուզական ծառայության նախկին աշխատակից Սերգեյ Սկրիպալի ու նրա դստեր՝ Յուլյայի թունավորման սկանդալային գործով երկու կասկածյալների անունները:
Ինչպես հայտնում է The Guardian-ը, խոսքն Ալեքսանդր Պետրովի ու Ռուսլան Բոշիրովի մասին է, որոնք Սկրիպալների դեմ հարձակումից մի քանի օր առաջ «Աէրոֆլոտ»-ի չվերթներից մեկով Մեծ Բրիտանիա էին մեկնել:
ՌԴ արտաքին քաղաքական գերատեսչությունը, մեկնաբանելով բրիտանական իշխանությունների հայտարարությունը, ասել է, որ այդ անունները Մոսկվային ոչինչ չեն ասում:
Մինչդեռ Թագավորական դատախազության ծառայության պնդմամբ՝ իրենք բավականաչափ ապացույցներ ունեն այս մարդկանց դեմ մեղադրանք ներկայացնելու համար:
Աղբյուրը մանրամասնում է, որ տղամարդիկ կասկածվում են Սկրիպալների դեմ մահափորձ կատարելու, ինչպես նաև մահացու վտանգավոր «Նովիչոկ» թույնն իրենց մոտ պահելու, օգտագործելու համար:
Հայտնի է, որ պաշտոնական Լոնդոնը չի դիմելու Մոսկվային կասկածյալներին արտահանձնելու հարցով, քանի որ նրանց ձերբակալման համար եվրոպական օրդեր կա:
Պարբերականը նկատում է, որ Սերգեյ Սրիպալը ՌԴ նախագահ Վլադիմիր Պուտինի ռեժիմի կողմից ընկալվում է որպես դավաճան՝ պետական գաղտնիքները Մեծ Բրիտանիային վաճառելու ու հետո այդ երկիր փախչելու համար:
Հիշեցնենք, որ 66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության էին ենթարկվել անգլիական Սոլսբերի քաղաքում և անգիտակից վիճակում տեղափոխվել հիվանդանոց։
Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում:
