«Նախորդ տարվա ձեռքբերում եմ համարում այն, որ եվրոպացիների հետ Ասոցացման համաձայնագիր չկնքեցինք, իսկ ամենախայտառակ կորուստը գենդերային օրենքն էր՝ դա ինձ համար ամենավատ բանն էր նախորդ տարվա»,- ամփոփելով 2013 թվականը՝ «Առաջին լրատվական»-ի հետ զրույցում ասաց «Քրիստոնեա-ժողովրդավարական վերածնունդ» կուսակցության նախագահ Սոս Գիմիշյանը:
«Մենք փաստացի չարիքի փորքագույնն ընտրելով՝ հայտնվել ենք նման իրավիճակում: Որոշված փաստ է Մաքսային միությունը: Այդ միությունը, բոլոր թերություններով հանդերձ, կարող է մեր երկրին և ժողովրդին լուրջ, որոշակի ձեռքբերումներ, օգուտներ հնարավորություններ ընձեռել»,- ասաց նա:
Ըստ Գիմիշյանի՝ այդ հնարավորություններից, օգուտներից օգտվելու համար անհրաժեշտ է կարգին իշխանություն ունենալ. «Իշխանություն, որը ոչ թե քաղաքական խաղերով է զբաղված, այլ երկրի, ժողովրդի մասին է մտածում: Կուզենայի այդպիսի իշխանություն ձևավորվեր՝ հայաստանամետ իշխանություն և ոչ թե արևմտամետ, ռուսաստանամետ կամ այլ, հայաստանամետ իշխանություն է հարկավոր»:
Նրա պնդմամբ՝ հայաստանամետ քաղաքական ուժերը պետք է գան իշխանության, իսկ այսօրվա իշխանությունները՝ հայ ժողովրդին որևիցե օգուտ բերել չեն կարող:
«Հասարակությունը հիմա չափից դուրս ծանր վիճակում է, և դրա մեղավորությունը նաև մեր՝ քաղաքական գործիչներինս է: Աստված ուժ, համբերություն և հնարավորություն տա մի կերպ այս ծանր վիճակը հաղթահարելու համար, դիմանալ, հույս ունենալ, որ մոտակա ժամանակներում մենք հայաստանամետ իշխանություն կունենանք, որ այս ծանրագույն վիճակից դուրս գանք»,- եզրափակեց նա:
