Թուրքական Radikal թերթի փոխանցմամբ՝ Իզմիրում գտնվող ՆԱՏՕ-ի ռազմաբազայում ահաբեկչական («Ալ-Քաիդա») տագնապ է հայտարարվել։ Թուրքական ոստիկանությունը շրջում է ռազմաբազայի շուրջն ընկած 3000 տներով ու շինություններով և հարցուփորձ անում մոտ 10,000 մարդկանց շրջանում։
Հնարավոր կասկածյալներն առնվում են վերահսկողության տակ։ Թուրքական կողմը մտահոգ է, որ մայիսի 2-ին Ուսամա բեն Լադենի սպանությունից հետո «Ալ-Քաիդա»-ն կարող է անցնել պատասխան գործողությունների։
Հիշեցնենք, որ օրեր առաջ ՆԱՏՕ-ի ռազմածովային ուժերի հրամանատարությունն անցել է Թուրքիային։ Թուրքիան այս նոր գործառույթները կիրականացնի մինչև 2011 թվականի դեկտեմբերն ընկած ժամանակահատվածը։
Բացի այդ, ՆԱՏՕ-ն որոշել է հրաժարվել Հունաստանում ունեցած ռազմաբազայից և Իզմիրը վերածել տարածաշրջանի ամենակարևոր կենտրոնակայանի։ ՆԱՏՕ-ն ցանկանում է Իզմիրի ռազմաօդային կայանը վերածել ցամաքային ռազմաբազայի։
Իզմիրում է տեղակայված Լիբիայի դեմ ՆԱՏՕ-ի ռազմաօդային օպերացիայի հրամանատարական կետը։
