«Ինձ համար մտահոգիչ և վտանգավոր է այն հանգամանքը, որ Ռուսաստանի ԱԳ նախարարի կողմից արվում է այն պնդումը, թե Հայաստանի Հանրապետությունում Մարտի 1-ի գործի շրջանակներում իրականացվում է քաղաքական հետապնդում նախկին իշխանությունների այս կամ այն ներկայացուցիչների նկատմամբ: Սա դիվանագիտական անթույլատրելի լեքսիկոն է»,- անդրադառնալով ՌԴ ԱԳ նախարար Սերգեյ Լավրովի արած հայտարարությանը՝ «Առաջին լրատվական»-ի հետ զրույցում նշեց փաստաբան Նորայր Նորիկյանը:
Նրա խոսքով՝ սա դեմարշ է Հայաստանի Հանրապետությանը, Հայաստանի ինքնիշխանությանը. «Սա ստեղծված իրավիճակից արժանապատվորեն դուրս գալու նոր խնդիր է դնում Հայաստանի իշխանությունների առջև»:
Նորայր Նորիկյանը ընդգծեց՝ այլ կերպ ասած, ՌԴ իշխանությունները իրենց ԱԳ նախարարի շուրթերով ասում են, թե չեն վստահում ՀՀ նոր իշխանություններին. «Իսկ դա նշանակում է հայ-ռուսական հարաբերություններում ճգնաժամ, ինչը կարող է անդառնալի հետևանքներ ունենալ: Համենայնդեպս, մեր հանրային և քաղաքական օրակարգում չկա ռուսների հետ մեր հարաբերությունները վատթարացնելու խնդիր»:
Փաստաբանը Հայաստանում կայացող նոր իրողությունները համարում է ինքնիշխան պետությանը բնորոշ գործառույթներ, ինչը, նրա խոսքով, չեն հանդուրժում ՌԴ իշխանությունները. «Բայց մենք պետք է չկորցնենք մեր զգոնությունը, պետք է ամեն ջանք գործադրենք ռուսների հետ նորմալ, հավասարակշռված, զուսպ բանակցություններ վարելու բոլոր հարթակներում, նրանց հասցնելու այն ուղերձները, որ Հայաստանի ինքնիշխան քայլերը որևէ կերպ ուղղված չեն Ռուսաստանի դեմ»:
Որպես փաստաբան՝ մեր զրուցակիցը կարծում է, որ Լավրովի հայտարարությանը պետք է հստակ արձագանքել հետևյալ մեխանիզմով. «ՀՀ իշխանությունները պետք է առավելագույնս իրականացնեն Մարտի 1-ի գործով բոլոր մեղադրյալների պաշտպանության իրավունքի ապահովումը: Այս քրեական գործը պետք է հնարավորինս հրապարակայնացվի՝ ինչպես ՀՀ ներսում, այնպես էլ միջազգային հանրության համար՝ որ այս գործի ամբողջ նպատակը օբյեկտիվ ճշմարտությունը բացահայտելն է, և չկա որևէ մեկի նկատմամբ քաղաքական հետապնդում իրականացնելու ենթատեքստ»:
Նորայր Նորիկյանը նաև վտանգավոր միտում է տեսնում. «Փաստացի Լավրովի հայտարարությամբ շանտաժ է արվել Հայաստանի Հանրապետությանը. Հայաստանը կանգնած է դիլեմայի առջև՝ եթե շարունակվի Մարտի 1-ի գործով օբյեկտիվ քննության ընթացքը, իսկ այդ դեպքում, վստահ եմ, նոր մեղադրյալներ նույնպես կներգրավվեն այս քրեական գործում՝ ընդհուպ մինչև ՀՀ երրորդ նախագահը, ռուսների կողմից կարող է դիտվել որպես դեմարշ, իսկ այս գործով նահանջը կնշանակի տեղի տալ ռուսական սպառնալիքին»:
Հարցազրույցն ամբողջությամբ՝ տեսանյութում:
