Օրերս Ջերմուկում Ամուլսարի հարցով Նիկոլ Փաշինյանի անցկացրած խորհրդակցությունից հետո «Առաջին լրատվական»-ի հարցերին պատասխանել էին ազգայնական ներկայացող մարդիկ, ովքեր աչքի են ընկել, մեղմ ասած, ագրեսիվ վարքագծով: Այս նույն մարդիկ երեկ արդեն Գառնու տաճարում էին, որտեղ հեթանոսական ծիսակարգով նշում էին Վարդավառը:
Սակայն վերադառնանք Ամուլսարին, ավելի շուտ նրա նորահայտ պաշտպաններին, որոնք խոստանում են հանքի շահագործման դեմ պայքարել կյանքի գնով, սպառնում են զենքն ուղղել բոլոր այն մարդկանց ու նրանց ընտանիքների դեմ, ովքեր կհանդգնեն շահագործել հանքը: Ընդ որում` ելույթ ունեցողների քննադատության, անհանդուրժողականության թիրախն առաջին հերթին Նիկոլ Փաշինյանն էր, ինչը նրանք չէին էլ թաքցնում:
https://www.youtube.com/watch?v=jkWjHqmj8t4
Ավելորդ է ասել, որ ահաբեկչական հակումներ ունեցող այս ինքնակոչներն որևէ առնչություն չունեն այն մարդկանց հետ, ովքեր 2012թ-ից պայքարում են Ամուլսարի հանքի շահագործման հետ: Համաձայն լինենք բնապահպանների փաստարկների հետ, թե ոչ, նրանց բոլոր գործողությունները, ակցիաները անցկացվել են բռնության բացառման հիմքով: Այս օրերին էլ Ամուլսարի ճանապարհը փակած մարդիկ բացառապես խաղաղ անհնազանդության կոչ են անում:
Հիմա ականատես ենք լինում այն ռիսկերին, որոնց մասին քանիցս բարձրաձայնել ենք: Հեղափոխության հաղթանակից հետո անհրաժեշտ է ժամանակ տալ Նիկոլ Փաշինյանի կառավարությանը, որպեսզի աստիճանաբար լուծում գտնվի տարիներով կուտակված խնդիրներին, այդ թվում` Ամուլսարի բարդ խնդրին: Երբ հասարակության վստահության մանդատն ունեցող կառավարության պարագայում քաղաքացիական անհնազանդության ակցիաներ են կազմակերպվում, նույնիսկ դրանց կազմակերպիչների ցանկություններից անկախ` դրանք հարթակ են դառնում մարգինալ ուժերի ինքնադրսևորման, հակահեղափոխության ռևանշի համար:
Դժվար է ասել, թե որոնք են կադրերում հայտնված նորահայտ «մաուզերիստների» իրական մոտիվները, սակայն նրանք հաստատապես վարկաբեկում են խաղաղ պայքարի ավանդույթներ ունեցող էկոլոգիական շարժումը և, այսպես ասած, հաղթաթուղթ են դառնում «Լիդիան Արմենիա» ընկերության համար: Եթե տրվենք դավադրության տեսությանը, ապա կարող ենք նույնիսկ ենթադրել, որ հանքը շահագործողներն են այս «ականը» ներդրել բնապահպանական շարժման ընդերքում` այն պայթեցնելու, վարկաբեկելու նպատակով:
Բայց սա ընդամենը վարկած է, ինչպես նաև այն, որ «մաուզերիստները» կարող են հակահեղափոխության ռևանշի ավելի մեծ պլանի մաս լինել կամ նույնիսկ ինքնաբուխ «ռոմանտիկներ»:
https://www.youtube.com/watch?v=iw3mPmsicqs
Որն էլ լինի ճշմարտությունը, ԱԱԾ-ն պարտավոր է լրջորեն զբաղվել մարդկանց խմբով, որը նոր Հայաստանում փաստացի առաջինն է, որը սպառնում է զենքի ուժով հարց լուծել: Ահաբեկչությունը, բռնությունը դարձել են մեր հասարակության, նրա առնվազն մի հատվածի քրոնիկ հիվանդությունը, որը չվերացավ նույնիսկ թավշյա հեղափոխությունից հետո: Պոտենցիալ ահաբեկիչների գաղափարա-քաղաքակսն փաթեթավորումը կամ իրական հնարավորությունները մեզ բացարձակապես չեն հետաքրքրում, որովհետև եթե կան կրակելու պատրաստ մարդիկ, ապա միշտ էլ կգտնվեն ահաբեկչության ներքին և արտաքին շահառուներ: Երևանի կեսը, որին Նաիրի Հունանյանը պատմել էր Վազգեն Սարգսյանին սպանելու մտադրության մասին, ահաբեկչության հնարավորությանը չէր հավատացել: Ավելի լավ է կանխել նույնիսկ շառլատանին` վաղը երկիրն ահաբեկչության «գյուլայի» զոհ չդարձնելու համար:
