Թուրքական Իզմիր քաղաքում առնվազն վեց հոգու կալանավորել են՝ գործող նախագահ Ռեջեփ Թայիպ Էրդողանին վիրավորելու համար։
Թուրքական ԶԼՄ–ները նաև հաղորդում են, որ քրդերի իրավունքների համար պայքարող ծայրահեղական խմբավորում՝ Քրդստանի աշխատավորական կուսակցությունը հայտարարել է ընտրությունների ընթացքում 24-ժամյա հրադադարի մասին։
Ձերբակալությունները տեղի են ունեցել արտահերթ խորհրդարանական և նախագահական ընտրությունների օրը։
Չնայած, որ հարցումների տվյալներով առաջատարը գործող նախագահ Էրդողանն է, նրա հիմնական մրցակիցը՝ ընդդիմադիր Հանրապետական կուսակցության թեկնածու Մուհարեմ Ինջեն, մի քանի տոկոսի տարբերությամբ, կարող է երկրորդ փուլ դուրս գալ։
Նախօրեին Ինջեի կողմնակիցների հանրահավաքին մի քանի միլիոն մարդ էր փողոց դուրս եկել, շատ ավելի շատ, քան Էրդողանի հանրահավաքների ժամանակ։
Ինջեն խոստացել է, որ հաղթանակի դեպքում կչեղարկի արտակարգ դրության ռեժիմը, որը Թուրքիայում գործում է 2016 թվականի ռազմական հեղաշրջման փորձից հետո, ինչպես նաև վերջ կդնի քաղաքացիների նկատմամբ խտրականության քաղաքականությանը։ Վերջին տարիների ընթացքում տասնյակ հազարավոր մարդիկ են քաղաքական նկատառումներով հետապնդումների ենթարկվել։
Անկախ դիտորդները, միջազգային իրավապաշտպան կազմակերպություններն ու ակտիվիստները մտավախություն ունեն, որ ընտրությունների ընթացքում կարող են զանգվածային լցոնումներ լինել՝ Էրդողանի թեկնածության օգտին։
Էրդողանը իշխանության ղեկին է գտնվում արդեն 15 տարի շարունակ. սկզբում վարչապետի պաշտոնում, իսկ 2014—ից՝ որպես նախագահ։
Նախագահի պաշտոնի համար հավակնում է վեց թեկնածու, այդ թվում, անազատության մեջ գտնվող՝ Ժողովուրդների դեմոկրատիայի քրդամետ կուսակցության առաջնորդ Սելահաթին Դեմիրթաշը։
