Ռուսաստանի Դաշնության նախագահ Դմիտրի Մեդվեդևը հարցազրույց է տվել բրիտանական The Financial Times-ին, որտեղ մի շարք ուշագրավ հայտարարություններ է արել իր առաջադրվելու, Պուտինի հետ հարաբերությունների և ներքաղաքական զարգացումների վերաբերյալ:
Խոսելով Պուտինի հետ հարաբերությունների մասին՝ նա ասել է, որ սխալ է համարում այն պնդումները, թե իր և վարչապետ Պուտինի միջև տարաձայնություններն ավելացել են: «Երևի մենք ինչ որ բաների տարբեր գնահատականներ ենք տալիս, և այս կամ այն նպատակներին հասնելու համար տարբեր մեթոդներ ենք տեսնում, սակայն ես կարծում եմ, որ դա լավ է։ Դա առավելություն է»,- ասել է Մեդվեդևը:
Նա նաև բացառել է, որ Պուտինի հետ միաժամանակ կառաջադրվեն 2012 թ. նախագահական ընտրություններում: «Բանն այն է, որ մենք Վլադիմիր Պուտինի հետ (որն իմ գործընկերն է և հին ընկերը) ի վերջո ներկայացնում ենք միևնույն քաղաքական ուժը: Այդ առումով մրցակցությունը մեր միջև կարող է վնասաբեր լինել այն խնդիրների և նպատակների համար, որոնք մենք իրականացնում ենք վերջին տարիներին: Այդ պատճառով, հավանաբար, դա լավագույն սցենարը չէ մեր երկրի և կոնկրետ այս իրավիճակի համար», նշել է նախագահը:
Մեդվեդևն ասել է, որ յուրաքանչյուր պաշտոն մարդու վրա իր հետքն է թողնում, և նախագահի պաշտոնն էլ փոխում է կյանքի ընկալումները, այլ կերպ աշխատել հնարավոր չէ: Խոսելով կառավարության հետ հակասությունների մասին նա ասել է, որ ընդհանուր առմամբ այդպիսիք չկան. «Դա վերջիվերջո իմ կառավարությունն է, և ավելին՝ այնտեղ աշխատում են բոլոր իմ ընկերները և ոչ մի էական հակասություններ մենք, իհարկե, չունենք: Կարող ենք վիճել, և ես երբեմն ստիպված եմ, այսպես ասած, առաջ գցել իմ որոշումները»,- ասել է Մեդվեդևը:
Նա հավելել է, որ շարունակելու է բարեփոխումները: Ինչպես նշել է նա՝ ցանկացած նախագահ պարտավոր է առաջադրվել երկրորդ անգամ. «Այլ հարց է, թե կցանկանա՞ նա այդ որոշումն ընդունել, թե՞ ոչ: Այս որոշումը ոչ միայն իր ցանկությունից է կախված»:
Մեդվեդևը նաև անդրադարձել է ԽՍՀՄ փլուզմանը, և ի տարբերություն վարչապետ Պուտինի, ասել է, որ դա ամենևին էլ խոշորագույն աշխարհաքաղաքական աղետը չէր 20-րդ դարում: Այդպիսի աղետ է, ըստ նախագահ Մեդվեդևի, Երկրորդ համաշխարհային պատերազմը: Մեդվեդևը խոսել է նահանգապետերի ընտրությունները վերականգնելու օգտին, իսկ խորհրդարանի անցումային տոկոս է ցանկանում սահմանել 3-5%-ը, որպեսզի ողջ քաղաքական ներկապնակը ներկայացված լինի երկրի օրենսդիր մարմնում:
