Արարատի և Վայոց Ձորի մարզերի ընդհանուր իրավասության դատարանում Թաթուլ Պողոսյանի նախագահությամբ ավարտվել է Վադիմ Օհանյանի գործի դատական քննությունը:
37-ամյա պայմանագրային զինծառայող, կոչումով՝ շարքային Վադիմ Օհանյանը 2016 թվականին դատվել էր թեթև աստիճանի մարմնական վնասվածք պատճառելու համար: Իսկ ներկա քրեական գործով նա մեղադրվում էր ավազակությամբ զուգորդված դիտավորյալ սպանության և առանց հափշտակելու նպատակի մեքենա փախցնելու համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով և 183 հոդվածի 1-ին մասով:
Ըստ մեղադրանքի՝ 2017 թվականի ապրիլի 21-ին, ժամը 19-ի սահմաններում Վադիմ Օհանյանը Արարատի մարզի Նորամարգ գյուղում դիտավորությամբ կյանքից զրկել է Մասիս քաղաքի 69-ամյա բնակիչ Հարություն Ա.-ին: 2017 թվականի ապրիլի 21-ին, ժամը 18-ի սահմաններում Վադիմ Օհանյանը Մասիս քաղաքի կենտրոնական հրապարակում նստել է Հարություն Ա.-ի կողմից որպես տաքսի վարած «Օպել Աստրա» մեքենան ու պատվիրել է իրեն տեղափոխել Արարատի մարզի Նորամարգ գյուղի գերեզմանատուն: Ըստ մեղադրանքի՝ Վադիմ Օ.-ի նպատակը ոչ թե գերեզմանատուն գնալն էր, այլ տաքսու վարորդին ավազակությամբ զուգորդված սպանելը և նրա մոտ եղած փողն ու նյութական այլ արժեքները հափշտակելը:
Վադիմի առաջարկած երթուղով ընթացել են Նորամարգ գյուղ: Նորամարգ ու Ռանչպար գյուղերի մոտակայքով անցնող ոռոգման բաց ջրատարի մոտ Վադիմ Օհանյանը վարորդից պահանջել է կանգնեցնել մեքենան՝ բնական կարիքը հոգալու պատճառաբանությամբ:
Օգտվելով այն հանգամանքից, որ տեղանքում մարդ չկար՝ իրեն տեսնողներ չկային, Վադիմն իջել է մեքենայից, ապա մեքենայից իջած Հարություն Ա.-ին ավազակությամբ զուգորդված սպանելու դիտավորությամբ իր մոտ եղած միակողմանի սուր սայր ունեցող ծակող-կտրող գործիքով հինգ անգամ հարվածել է նրա ձախ ուսային հոդի ու գոտկային շրջաններին՝ պատճառելով թեթև վնաս: Այնուհետև վերցրել է գետնին ընկած մետաղե ատամնանիվը, դրանով մեկ անգամ հարվածել է վարորդի գլխին:
Գանգուղեղային փակ բութ վնասվածքից Հարություն Ա.-ն տեղում մահացել է:
Վադիմ Օհանյանը, ըստ մեղադրանքի, Հարություն Ա.-ին սպանելուց հետո նրա հագուստի գրպաններից հանել ու հափշտակել է 15 հազար դրամ և «Սամսունգ» հեռախոս, ապա դիակը քարշ տալով՝ գցել է ջրատարի մեջ:
Դրանից հետո Վադիմ Օհանյանը տուժողի մեքենան առանց հափշտակելու նպատակի՝ վարելով տարել է Նորամարգ գյուղ, կանգնեցրել է Նորամարգ գյուղի 17-րդ փողոցի վերջնամասում ու հեռացել է: Նա գյուղի խանութներից գնումներ է կատարել սպանված վարորդից հափշտակած փողով ու գնացել է տուն…
Դատարանն ապացուցված է գնահատել հետևյալ հանգամանքները. 2015 թվականի դեկտեմբերի 28-ին Վադիմ Օհանյանը «ՎՏԲ-Հայաստան» բանկի Մասիսի մասնաճյուղից 650 հազար դրամ վարկ է վերցրել՝ յուրաքանչյուր ամիս 20 հազար 800 դրամ վճարելով վարկը մարելու պայմանով, վարկը մարելու վերջնաժամկետ է նշանակվել 2018 թվականը:
Սակայն Վադիմ Օհանյանի կողմից վարկային պարտավորությունները չեն կատարվել: Բանկը 2016 թվականին հայցով մտել է Արարատի ու Վայոց Ձորի մարզերի ընդհանուր իրավասության դատարան՝ գումարի բռնագանձման պահանջով: 2017 թվականի մարտի 13-ին դատարանը վճռել է Վադիմ Օհանյանից հօգուտ «ՎՏԲ-Հայաստան» բանկի բռնագանձել 725 հազար 839 դրամ՝ որպես վարկի ընդհանուր պարտքի գումարի մարում:
2017 թվականի ապրիլի 2-ից մինչև ապրիլի 14-ը Վադիմ Օհանյանն ընդգրկված է եղել մարտական հերթապահությունում: Ապրիլի 14-ին նա վերադարձել է տուն և պարտավոր է եղել ծառայության վերադառնալ ապրիլի 22-ին՝ վերակարգում ընդգրկվելու համար:
Ապրիլի 14-ից սկսած՝ Վադիմ Օհանյանը դիմել է տարբեր մարդկանց՝ պարտքով գումար հայթայթելու նպատակով՝ վարկային պարտավորություններն ու այլ պարտքերը մարելու համար: Նրան մերժել են:
Ապրիլի 21-ին Վադիմ Օհանյանը հանդիպել է մորաքրոջը՝ վերջինիս աշխատավայրում: Պարտքով 50 հազար դրամ է խնդրել: Մորաքույրն ասել է, որ այդքան գումար չունի, բայց աշխատանքային օրվա վերջում կարող է 5 հազար դրամ տալ:
Վադիմը մորաքրոջն ասել է, թե գումարն իրեն շատ է անհրաժեշտ, առաջարկել է, որ մորաքույրը տնօրենից կամ որևէ աշխատողից պարտքով գումար վերցնի, բայց մորաքույրը չի համաձայնել, մերժել է քրոջ որդուն:
Նույն օրը, ժամը 14-ի սահմաններում Վադիմը պարտքով գումար խնդրելու համար զանգել է համագյուղացիներից մեկին, դարձյալ մերժում է ստացել: Այդ օրը նրան մերժել են բոլոր այն մարդիկ, ում հետ հույսեր էր կապում: Ի վերջո, ըստ դատական ակտի, Վադիմ Օհանյանը որոշել է գումար ձեռք բերել հանցավոր ճանապարհով՝ ավազակությամբ՝ ապօրինի կյանքից զրկելով որևէ տաքսու վարորդի և հափշտակելով նրա մոտ եղած գումարն ու այլ արժեքավոր իրերը:
Նույն օրը՝ ապրիլի 21-ին, ժամը 18-ի սահմաններում Վադիմ Օհանյանը Մասիսի կենտրոնական հրապարակում նստել է Հարություն Ա.-ի տաքսին…
Դատարանում Վադիմ Օհանյանն իրեն մեղավոր չի ճանաչել: Նա հայտնել է, թե դեպքի օրը՝ 2017 թվականի ապրիլի 21-ին, գնացել է Երևան՝ մասնավոր աշխատանքներ կատարելու՝ շինաղբ թափելու: Այդ օրը կատարած աշխատանքի դիմաց ստացել է 15 հազար դրամ, պատահական մեքենայով հասել է Մասիս, մտել է եկեղեցի: Այնուհետև մոտ տասը րոպե նստել է եկեղեցու բակում, ապա հրապարակի մոտի խանութից օղի է գնել, նստել է հրապարակում կանգնած տաքսիներից մեկը՝ Հարություն Ա.-ի մեքենան: Նախկինում Հարություն Ա.-ին չի ճանաչել: Պատվիրել է, որ նա իրեն տանի Նորամարգ գյուղի գերեզմանատուն: Այնտեղ իր գնած օղուց մի կում խմել է, մնացած օղին թափել է եղբոր գերեզմանին, շիշը դրել է այնտեղ, նորից նստել է տաքսին:
Հարևան գյուղում գտնվող Գրիշայի խանութի մոտ տաքսին կանգնեցրել է, որ առևտուր անի՝ գնել է ծխախոտ, լիմոնադ, ուտելիք: Չի հիշում՝ ինչքան է կազմել գումարը, բայց խանութի աշխատողին է տվել 10 հազար դրամ, իրեն մանր են վերադարձրել: Իրեն այդտեղ բերած տաքսին արդեն հեռացել էր, ինքն այդ տաքսու վարորդին այլևս չի տեսել: Զանգել ու կանչել է համագյուղացիներից մեկին, որ մեքենայով գա ու իրեն տուն տանի: Ճանապարհին ևս մի խանութ է մտել, առևտուր է արել՝ թան է գնել, լիցքավորել է հեռախոսը: Գնացել է տուն: Մեկ-երկու օր մնացել է տանը ու գնացել է ծառայության: Այնտեղից վերադարձել է ապրիլի 26-ին: Հաջորդ օրը ինքը հողամասում աշխատում էր, երբ ոստիկանները եկել ու իրեն բերման են ենթարկել տաքսու վարորդի սպանության կասկածանքով:
Վադիմ Օհանյանը պնդել է, թե ինքը ոչ մի կապ չունի տաքսու վարորդի սպանության հետ: Ճիշտ է, ինքը մի քանի հոգուց, նաև՝ իր մորաքրոջից պարտքով գումար է խնդրել, բայց դա եղել է ոչ թե ապրիլի 21-ին, այլ՝ ապրիլի 18-ին: Այդ գումարներն ինքը խնդրել է որոշ հարցեր կարգավորելու նպատակով: Ամբաստանյալը չի ցանկացել մանրամասնել, թե ինչ խնդիրների մասին է խոսքը:
Վադիմ Օհանյանը նշել է, թե նախաքննական խոստովանական ցուցմունքները տվել է ծեծի ազդեցության տակ: Ցուցմունքը գրել է իր ձեռքով, բայց ինքը չի սպանել…Ինքը վախեցել է բողոքել քննիչին՝ «հուշտ է եղել»: Պաշտպանին էլ չի ասել: Իր հագուստի վրայի արյան հետքերը առաջացել են, երբ ինքը փորձել է օգնել փողոցում արյունոտ ընկած մի մարդու:
Նախաքննական խոստովանական ցուցմունքում Վադիմ Օհանյանն ընդունել , որ ինքն է սպանել տաքսու վարորդին, բայց գրել է, թե սպանել է ո՛չ հափշտակություն կատարելու նպատակով, այլ՝ անհասկանալի պատճառով: Սպանությունից հետո մեքենայով անցել է վարորդի ոտքերի վրայով, որ ստուգի՝ նա մահացել է, թե ոչ: Հետո մարմինը գցել է Զանգու գետը, մի քանի րոպե սպասել ու համոզվել է, որ մարմինը հոսանքը քշել է, վերադարձել է մեքենայի մոտ, դրանով հասել է իրենց գյուղի դպրոցին հարակից արտեզյան աղբյուրի մոտ, մեքենան թողել է այնտեղ, գնացել է գյուղի մի քանի խանութ, առևտուր է արել, հետո համագյուղացիներից մեկի տաքսիով գնացել է տուն:
Նախաքննական ցուցմունքում Վադիմ Օհանյանը նշել է, թե վարորդի հետ չի վիճել, նրան սպանելու միտքն առաջացել է հանկարծակի՝ երբ տեսել է գետնին ընկած մետաղե ատամնանիվը, սպանությունից հետո ինքը վարորդից ու նրա մեքենայից ոչինչ չի վերցրել: Գիտակցում է, որ մարդ է սպանել, զղջում է…
Նախաքննական մեկ այլ ցուցմունքում Վադիմ Օհանյանն ասել է, թե վարորդը «ղարաբաղցիների» հասցեին վատ է արտահայտվել, ինքը դրանից է զայրացել ու սպանել է նրան: Իրականում վարորդի ոտքերի վրայով մեքենայով չի անցել, չի հասկանում՝ նախկինում ինչու է նման բան ասել…
Դատարանը հաշվի է առել, որ Վադիմ Օհանյանի խնամքին է անչափահաս մեկ երեխան ու մայրը:
Դատարանը Վադիմ Օհանյանին մեղավոր է ճանաչել ավազակությամբ զուգորդված սպանության ու առանց հափշտակելու նպատակի մեքենան փախցնելու համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով և 183 հոդվածի 1-ին մասով:
Վադիմ Օհանյանը վերջին հաշվով դատապարտվել է 17 տարի ազատազրկման:
Պատժի սկիզբը՝ 2017 թվականի ապրիլի 28-ից:
Վադիմ Օհանյանից հօգուտ քաղաքացիական հայցվոր Սրբուհի Ս.-ի կբռնագանձվի 1 միլիոն 500 հազար դրամ՝ որպես տուժողի հուղարկավորության ծախսերի հատուցում:
