Թուրքիայում արմատներին վերադարձած հայ ընտանիքը դատական որոշմամբ ձեռք է բերել իր երեխային հայկական դպրոց ուղարկելու իրավունք:
Ֆրանսիական «Յառաջ» պարբերականի փոխանցմամբ՝ Պոլսի «Ակօս» շաբաթաթերթը հաղորդել էր, թե այդ ընտանիքը չէր կարողանում իր երեխային հայկական դպրոց ուղարկել, քանի որ կրթության նախարարությունը պատճառաբանել էր, թե երեխան հայ չէ։ Դատարանը հիմնվելով Պոլսի պատրիարքարանի ներկայացրած փաստաթղթի վրա՝ որոշել է, որ երեխային հայկական դպրոց հաճախելու արգելքը անհիմն է։
Հայ ընտանիքի փաստաբանը նշել է, որ դատարանի որոշումը կարող է նախադեպ հանդիսանալ նման իրավիճակում հայտնվող մյուս հայ ընտանիքների երեխաների համար։
Դատարանի որոշման մեջ շեշտված է նաև, որ մարդկանց ազգային ինքնության որոշման համար ազգային ծածկագրերի կիրառումը հակասում է օրենքին։ Մի քանի ամիս առաջ «Ակօս»-ը գրել էր, որ քրիստոնեության վերադառնալուց հետո իր զավակը հայկական դպրոց ուղարկել ձգտող մի ընտանիք բարդ գործընթացում բացահայտել էր, որ Թուրքիայի Հանրապետության ստեղծման օրից ի վեր հայերին տրվել է «2» ծածկագիր՝ նրանց հեշտորեն բնորոշելու համար:
