Հայտնի ֆրանսիացի էստրադային երգիչ և կինոդերասան Մորիս Շևալյեի (1888-1972) իրերը վաճառվել են Փարիզում Drouot տան կազմակերպած աճուրդում: 1950 թվականի արտադրության Patek Philippe շվեյցարական պլատինե ժամացույցների հին մոդելը վաճառվել է 25.1 հազար եվրոյով: 13.7 հազար եվրոյով էլ վաճառվել է դերասանին պատկանած Mercedes-Benz 250 С ավտոմեքենան: Այս մասին հայտնում է ITAR-TASS-ը:
Վաճառվել է նաև գլխարկը, որով Շևալյեն մշտապես բեմ էր բարձրանում: Երգչի անձնական պատվերով ծղոտից հյուսված գլխարկը գնորդին արժեցել է 5100 եվրո: Մորիսի անձնագիրը գնահատվել է 2000 եվրո:
Հայտնի ամերիկացի լուսանկարիչ Իրվինգ Պենի կողմից արված դերասանի լուսանկարը վաճառվել է 17.5 հազար եվրոյով: Դրանից կես գին էժան իրացվել է նրա դաշնամուրը:
Շևալյեյի իրերը գտնվել են նրա վերջին սիրեցյալի՝ Օդետ Մեսիլիեյի մոտ, ում նա կտակել էր իր ամբողջ ունեցվածքը: Մեսիլիեն մահացել է 2013-ի մայիսին: Նա ծրագրել էր ստեղծել շանսոնյեին նվիրած թանգարան, սակայն ֆինանսական պատճառներով այդպես էլ չի հասցրել իրականացնել մտադրությունը:
