ԱՄՆ ռազմաօդային ուժերի նախարար Հիզեր Ուիլսոնը, մեկնաբանելով Թուրքիայի կողմից ռուսական C-400 զենիթահրթիռային համակարգերի գնումը, հայտարարել է, որ իրենք չեն ցանկանում տեսնել C-400 համակարգերն իրենց F-35 կործանիչների կողքին, գրում է diken.com.tr-ը։
Ամերիկացի նախարարը նշել է, որ իրենք հարցի վերաբերյալ կիսել են իրենց մտահոգությունները Թուրքիայի հետ։
«Մենք հուսով ենք, որ Թուրքիան կլուծի այս հարցը մինչ F-35-ներ ձեռք բերելը», – ասել է Ուիլսոնը։
Ավելի վաղ Թուրքիայի՝ միջազգային հարցերով խորհրդարանական հանձնաժողովի ղեկավար Վոլքան Բոզքիրը հայտնել էր, որ ԱՄՆ-ում Անկարային սպառնացել են թույլ չտալ հինգերորդ սերնդի F-35 կործանիչների վաճառքը՝ Ռուսաստանից С-400 զենիթահրթիռային համակարգեր ձեռք բերելու դեպքում:
Թուրքիայի արտաքին գործերի նախարար Մևլութ Չավուշօղլուն այսօր հայտարարել է, որ եթե ԱՄՆ-ն, ի վերջո, չմատակարարի իրենց խոստացված F-35 կործանիչները՝ «Թուրքիան դրանք ձեռք կբերի այլ երկրից»։
