ԱՄՆ-ը տեղեկատվություն չունի այն մասին, որ Սիրիայի իշխանությունները հերթական քիմիական հարձակումն են իրականացրել ապստամբ խմբավորումների դեմ: Այս մասին հաղորդում է Reuters գործակալությունը՝ վկայակոչելով Վաշինգտոնում իր պաշտոնական աղբյուրը:
Նախօրեին Սիրիայի ընդդիմությունն իշխանություններին կրկին մեղադրել է այն բանում, որ վերջիններս քիմիական զենք են կիրառել ապստամբ խմբավորումների դեմ: Ապստամբների տվյալներով՝ հարձակման հետևանքով թունավորվել է յոթ մարդ: Ի ապացույց ընդդիմությունը տեսանյութ էր հրապարակել համացանցում:
Սիրիայի իշխանությունները և ընդդիմությունը բազմիցս մեղադրել են միմյանց քիմիական զենք կիրառելու մեջ: Նման պատահարների հետաքննությունը վարում է ՄԱԿ-ի հատուկ հանձնաժողովը: Ինչպես ակնկալվում է, միջազգային կազմակերպության տեսուչների զեկույցը Սիրիայում ենթադրյալ քիմիական հարձակումների մասին Անվտանգության խորհրդի անդամներին կներկայացվի դեկտեմբերի 13-ին:
