Ամերիկյան CNN հեռուստաալիքի լրագրող Բոբ Ֆրանկենը քննադատություն է ուղղել նախագահ Բարաք Օբամայի վարչակազմի հասցեին՝ հայտարարելով, որ Սպիտակ տան ներկայիս ղեկավարությունը ԱՄՆ ողջ պատմության ընթացքում ԶԼՄ-ների հանդեպ ամենաանբարյացակամն է:
Ամերիկացի լրագրողը ԱՄՆ կառավարության գործողություններն անվանել է քարոզչություն, քանի որ այն թույլատրում է պետության առաջին դեմքերի հետ աշխատել միայն «իր մարդկանց»: «Կառավարությունը լուսաբանում է կառավարությանը. ահա թե ինչ է ստացվում»,- հայտարարել էր Ֆրանկենը:
Նա նշել է, որ ցանկացած վարչակազմ փորձում է վերահսկել մամուլը, սակայն այս կառավարությունն ԱՄՆ ողջ պատմության ընթացքում թշնամաբար է տրամադրված: Լրագրողը հայտարարել է, որ դա այն չէ, ինչով պետք է զբաղվի կառավարությունը:
Նա նաև հավելել է, որ ԱՄՆ արդարադատության նախարարությունը քայլեր է ձեռնարկում մամուլի դեմ, ինչից հասկանալի է, որ վարչակազմն արհամարհում է լրագրողական գործընթացը: «Սակայն առանց դրա անհնար է տեղեկացված ընտրազանգված ունենալ»,- մտահոգվել է Ֆրանկենը:
Հիշեցնենք, որ նոյեմբերին ավելի քան 3 տասնյակ խոշոր ամերիկյան ԶԼՄ-ների աշխատակիցներ գանգատվել են, որ լրագրողներին կանոնավոր կերպով մերժում են Օբամային լուսանկարել ծառայողական պարտականությունների կատարման և աշխատանքային հանդիպումների ժամանակ: Դրա փոխարեն Սպիտակ տունը պարբերականներին տրամադրում է միայն այն լուսանկարները, որոնք արել են սեփական լուսանկարիչները:
