Իշխանությունների մտադրությունների մեջ այնպիսի կտրուկ փոփոխություն տեղի չէր ունեցել, ինչպիսին տեղի ունեցավ սեպտեմբերի 3-ին: Իշխանությունը, անակնկալ հայտարարելով ՄՄ-ին անդամակցելու մասին, հմտացավ հասարակությանն իր դեմ հանելու գործում: Այսօր կայացած մամուլի ասուլիսի ժամանակ նման տեսակետ հայտնեց «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:
Նրա խոսքով` այն, ինչ տեղի է ունենում տարբեր հանդիպումների ժամանակ կուլուարներում, այդպես էլ անհայտ է մնում հասարակությանը: «Հասարակությունը պետք է տեղյակ լինի ստորագրված փաստաթղթերի կետերից: Միաժամանակ, ես համոզված եմ, որ մենք պատրաստ չենք որևէ միություն մտնելու: Չեմ կիսում ո՛չ ՄՄ մտնելու իշխանությունների ոգևորությունը, ոչ էլ Ասոցացման համաձայնագրին միանալու հեռանկարը»,- ասաց Ալավերդյանհը՝ հավելելով, որ դրսի ուժերի վրա ազդելուց առաջ պետք է ազդել նախ սեփական իշխանությունների վրա:
«Մինչև մենք ինքներս չհարգենք մեզ՝ որպես պետություն, մնալու ենք լուսանցքներում: Ի տարբերություն Ուկրաինայի, որտեղ մարդիկ հստակ ընդվզում են Ռուսաստանի հետ հետագա համագործակցության դեմ, Հայաստանում նման ծավալի դժգոհություն չեղավ և չէր կարող լինել»,- ասաց նա:
Լարիսա Ալավերդյանի համոզմամբ` Ռուսաստանի նախագահ Վլադիմիր Պուտինի՝ Հայաստան կատարած այցի մեսիջները շատ պարզ էին: «ՌԴ-ն չի կարող ուժեղ լինի, եթե լքի Կովկասը: Այս տարածաշրջանը Ռուսաստանը դիտարկում է որպես սլավոնական շրջան»,- ասաց նա:
Անդրադառնալով Պուտինի այցի մեսիջներին՝ «Ընդդեմ իրավական կամայականության» հկ-ի գործադիր տնօրենը նկատեց, որ այսուհետ Ադրբեջանը կարող է ասել՝ Հայաստանից առաջ ես ուզում եմ խոսել և հարաբերվել Ռուսաստանի հետ:
Լարիսա Ալավերդյանի համոզմամբ` չկա աղքատ երկիր, կա աղքատիկ կառավարում: «Եթե մենք աղքատ ենք, ինչպե՞ս է, որ երկրաշարժ, պատերազմ տեսած երկրում կան միջոցներ տնօրինող բազմաթիվ անձինք: Ես միշտ բարձր աշխատավարձ եմ ստացել, թոշակիս չափն էլ շուտով կմոտենա հարյուր դոլարի: Պատրաստ եմ թոշակս ամբողջությամբ տալու այն պաշտոնյային, որը կապացուցի, որ ամսական տասնութ հազար դրամով հնարավոր է գոյություն պահպանել: Սոցիալապես անապահով խավը մնում է երկրում և բազմապատկում երկրում ապրող աղքատների թիվը»,- ասաց նա:
Ամփոփելով՝ Լարիսա Ալավերդյանն անդրադարձավ պարտադիր կուտակային կենսաթոշակային համակարգի թեմային՝ շեշտելով, որ Հայաստանում դրա հապշտապ ներդրումը նվազեցնում է ոչ լեգիտիմ իշխանությունների հանդեպ հասարակության՝ առանց այդ էլ նվազ վստահության մակարդակը:
