ԱՄՆ նախկին նախագահ Բիլ Քլինթոնը կարծում է, որ ԱՄՆ Ազգային անվտանգության գործակալության կողմից համաշխարհային առաջնորդներին լրտեսելու մասին տեղեկատվության արտահոսքը վկայում է հատուկ ծառայությունների աշխատանքի մեթոդների փոխման անհրաժեշտության մասին: Ամերիկյան հեռուստատեսությանը տված հարցազրույցում Քլինթոնն առաջարկել է սահմանել համաշխարհային առաջնորդների գաղտնալսման հստակ կանոններ՝ փոխանցում է Interfax-ը:
Քլինթոնի խոսքով՝ իր նախագահության շրջանում (1993-2001թթ.) ինքը մեծ զգուշավորությամբ է վերաբերվել օտարերկրյա պետությունների ղեկավարների մասին հետախուզական տվյալների հավաքման նման ձևին:
«Դա կախված էր այն բանից, թե ում մասին է խոսքը: Եթե մենք կարծել ենք, որ այդ մարդիկ մասնակից են ԱՄՆ-ի հանդեպ թշնամական գործողություններին, ապա հատուկ ծառայությունները կարողացել են դրանով զբաղվել: Սակայն ես վստահ եմ, որ այն ժամանակ մենք չենք ունեցել դա նման մասշտաբով անելու հնարավորություն, ինչպես հիմա» ,- նշել է Քլինթոնը:
ԱՄՆ նախկին նախագահը կարծում է, որ ահաբեկչությունների կանխման նպատակով երկրի տարածքում գաղտնալսումների գործընթացը պետք է ավելի թափանցիկ լինի, իսկ նման գործողության կանոնները պետք է հանրային քննարկման դրվեն:
«Այն, թե ինչպես են հավաքվել այդ տվյալները, կասկած է առաջացնում մեր անվտանգության ամրապնդման վերաբերյալ, և միանգամայն ակնհայտ է, որ որոշ մարդիկ դա ընկալել են որպես ներխուժում անձնական կյանք»,- փաստել է Քլինթոնը:
Քաղաքական գործիչը նաև խոստովանել է, որ ԿՀՎ նախկին գործակալ Էդվարդ Սնոուդենի հրապարակումները լուրջ վնաս են հասցրել ԱՄՆ իմիջին:
