Ռուսաստանի պայքարն Ուկրաինայի համար, ինչը վերջին շաբաթներին ու ամիսներին հեղեղել էր լրահոսի գլխագրերը, մոտենում է ավարտին. Կիևը չստորագրեց ԵՄ-ի հետ Ասոցացման համաձայնագիրն անցած շաբաթ Վիլնյուսում տեղի ունեցած «Արևելյան գործընկերության» գագաթնաժողովի ժամանակ: Դա նշանակում է, որ Ռուսաստանի նախագահ Վլադիմիր Պուտինը վիթխարի հաղթանակ է տարել Արևմուտքի նկատմամբ: Այս մասին The Moscow Times-ում գրում է քաղաքական վերլուծաբան և հեռուստալրագրող Եվգենիա Կիսելյովը:
«Անորոշ է մնում այն, թե Պուտինը ինչ կախարդական բառեր է կիրառել՝ համոզելու համար Ուկրաինայի նախագահ Վիկտոր Յանուկովիչին չստորագրել ԵՄ-ի հետ Ասոցացման համաձայնագիրը, սակայն նա, ըստ երևույթին, Յանուկովիչին ցածր տոկոսադրույքներով միլիարդավոր դոլարների վարկեր է խոստացել, ինչի կարիքը խիստ զգում է Յանուկովիչը՝ բարելավելու համար Ուկրաինայի տնտեսական վիճակն ու ուժեղացնելու 16 ամիս անց վերընտրվելու իր շանսերը»,- գրում է հոդվածագիրը:
Մոսկվան այս տարվա Ռուսաստան-ԱՄՆ աշխարհաքաղաքական խաղում մեծ առաջնորդություն է ձեռք բերել: Կիսելյովը թվարկում է Արևմուտքի նկատմամբ Պուտինի հաղթական 5 միավորները. Վաշինգտոնը չկարողացավ հետ պահել Ռուսաստանին ԿՀՎ նախկին գործակալ Էդվարդ Սնոուդենին ապաստան տրամադրելու մտքից, Ռուսաստանը կարողացավ հետ պահել ԱՄՆ-ին, Մեծ Բրիտանիային ու Ֆրանսիային Սիրիայի նկատմամբ ռազմական գործողություն իրականացնելու ծրագրից, Ռուսաստանը խափանեց Հայաստանի հետ ԵՄ Ասոցացման համաձայնագրի ստորագրումը՝ համոզելով Երևանին միանալՄաքսային միությանը:
Որպես մյուս երկու հաղթական միավորներ նշվում են Forbes հեղինակավոր ամսագրի կողմից (ամերիկյան հրատարակությունը) Պուտինին աշխարհի ամենաազդեցիկ քաղաքական գործիչ ճանաչելու փաստը և Ուկրաինայի նախագահին ԵՄ-ի հետ Ասոցացման համաձայնագրի ստորագրման հարցում տարհամոզելը: Հոդվածագիրն այստեղ մեջբերում է Պուտինի սիրելի խոսքերը՝ «թույլերին ծեծում են»: Կիսելյովը նշում է, որ ԵՄ-ն թուլացել է տնտեսական ճգնաժամի հետևանքով ու միության ներսում պառակտվել: «Բրյուսելն իր թուլությունը բացահայտեց Սնոուդենի հետ կապված միջադեպի, սիրիական հարցի և հիմա էլ Ուկրաինայի շուրջ ստեղծված իրավիճակի միջոցով»,- ասվում է հոդվածում:
ԵՄ-ի հետ Ասոցացման համաձայնագրի ստորագրումից հրաժարվելուց հետո Կիևում եվրաինտեգրման կողմնակիցները մեծ աղմուկ բարձրացրին, իսկ ցուցարարների նկատմամբ ոստիկանության կոշտ գործողությունները լիովին փոխեցին քաղաքական իրավիճակը Յանուկովիչի, Պուտինի ու ողջ Ուկրաինայի համար: Կիևի ներկայիս քաղաքական անկայունությունը չի զիջում 2004-ի ճգնաժամին, որը հանգեցրեց «Նարնջագույն հեղափոխության»:
Պուտինի թվացյալ հաղթանակը օրեցօր պարտության է դատապարտվում, քանի որ Յանուկովիչի որոշման դեմ իրենց զայրույթն արտահայտող ուկրաինացիների թիվը գնալով ավելանում է:
Եթե Ուկրաինայում ճգնաժամը սրվի, ապա այն կարող է ապակայունացնել Եվրոպայի կենտրոնում տեղակայված, 50 մլն բնակչություն ունեցող երկիրը և ներկայացնել շատ ավելի հրատապ մարտահրավեր Եվրոպայի ու նրա անվտանգության համար:
