Այսօր Մամուլի ազգային ակումբը ՀՀ-ում Լեհաստանի Հանրապետության դեսպանության աջակցությամբ հրավիրեց հասարակական-քաղաքական քննարկում՝ «Հայաստանը փակուղո՞ւմ, թե՞ խաչմերուկում. Վիլնյուսից առաջ» թեմայով: Քննարկմանը մասնակցեցին ՀՀ-ում Լեհաստանի դեսպան Զդիսլավ Ռաչինսկին, «Ազատ դեմոկրատներ» կուսակցության մամլո խոսնակ Անժելա Խաչատրյանը, «Հրապարակ» օրաթերթի գլխավոր խմբագիր Արմինե Օհանյանը, ՕԵԿ փոխնախագահ Մհեր Շահգելդյանը, Հայաստանի դեմոկրատական կուսակցության նախագահ Արամ Գ. Սարգսյանը, «Ընդդեմ կամայական բռնության» ՀԿ ներկայացուցիչ Լարիսա Ալավերդյանը, ՀՀՇ կուսակցության գործադիր քարտուղար Կարեն Կարապետյանը և ՄԻԱԿ քարտուղար, ՀՀԿ խմբակցության անդամ Նաիրա Կարապետյանը:
Թեմայի շուրջ խոսեց «Հրապարակ» օրաթերթի գլխավոր խմբագիր Արմինե Օհանյանը՝ ասելով, որ տարիներ շարունակ երկրի տարբեր ատյաններից արվում էին հայտարարություններ, թե ՀՀ-ն գնում է դեպի Եվրոպա, սակայն սեպտեմբերի 3-ը շոկ էր ինչպես իր, այնպես էլ հասարակության շատ ներկայացուցիչների, իշխանության ամենաբարձր օղակներում գտնվող շատ գործիչների համար: Ըստ նրա, դատելով մեր ստացած տեղեկություններից՝ կարելի է ենթադրել, որ որոշումը եղել է սպոնտան, տարբեր ազդակների ներքո:
«Ճիշտ վերլուծություն կատարելու համար պետք է լիարժեք ինֆորմացիա ունենալ, բայց մենք չունենք այդպիսի ինֆորմացիա: Այս պայմաններում դժվար է ենթադրել, թե ինչն է դրդել ՀՀ նախագահին այդպիսի հայտարարություն անել: Եթե դա եղել է ռազմական միջամտության կամ այլ սպառնալիքի տեսքով, պետք է հայտարարվի համապարփակ հայաստանյան մոբիլիզացիա, որպեսզի ազգը տեղյակ լինի՝ ինչ սպառնալիքներ կան, որոնց ազդեցության տակ մեր իշխանություններն այսպիսի քայլի են գնացել:
Ինֆորմացիոն սով է, չենք կարող լիարժեք հետևություններ անել՝ ինչո՞ւ է ՀՀ իշխանությունն այդպիսի որոշումներ կայացրել: Ի վերջո՝ ի՞նչ ենք մենք ընտրում: Բոլորն ընդհանուր ֆրազներ են անում: Այսօր ՀՀ-ն հայտնվել է փակուղում ինֆորմացիոն սովի պատճառով:
Հանրությունը հայտնվել է պրոցեսներից դուրս վիճակում: Երկրի համար խիստ ճակատագրական որոշումներում չունենք մեր ասելիքը տեղ հասցնելու հնարավորություն, և նրանք, ովքեր կողմ են արտահայտվում, ընդամենը դա անում են իրենց կարգավիճակից ելնելով»,- նշեց Արմինե Օհանյանը:
Լուսանկարը` PanARMENIAN Photo-ի
