«Տվյալ անձը, հավանաբար, Սերժ Սարգսյանի հաճախորդների վաղեմի անդամ է եղել, վաղեմի հաճախորդ է։ Պարզապես հիմա հաճախորդների բացահայտման լայնածավալ գործընթաց է, նա էլ բացահայտել է իրեն»,- «Առաջին լրատվական»-ի հետ զրույցում ասաց «Երկիր Ծիրանի» կուսակցության նախագահ Զարուհի Փոստանջյանը՝ անդրադառնալով «Ժառանգության» նախկին նախագահ Րաֆֆի Հովհաննիսյանի այսօրվա դիտարկմանը, թե Արմեն Սարգսյանը լեգիտիմ նախագահ է։
Զարուհի Փոստանջյանի խոսքերով՝ այսօր ՀՀ-ում չկա օրինական իշխանություն՝ նախագահ, վարչապետ, ԱԺ նախագահ։ «Հայրենիքը բռնազավթված է։ Օրինականության մասին խոսելը, ցավալի է, իսկ ով դրա մասին խոսում է, բացահայտում է իր վաղեմի հաճախորդ լինելը»,- ասաց Փոստանջյանը։
Փոստանջյանը անդրադարձավ նաև Նիկոլ Փաշինյանի և քաղաքացիական նախաձեռնություններին միանալու հնարավորությանը։ Նա ընդգծեց, որ իրենք պատրաստ են համագործակցել միայն նրանց հետ, ովքեր դնելու են համակարգային փոփոխությունների պահանջ։ Իսկ մեկ անձի փոփոխությունը, նրա դեմ պայքարը, իրենց համար օրակարգ չի կարող լինել։ «Ես չեմ կարծում, որ այսօր առկա լոզունգների ներքո արդյունավետ կարելի է գործել։ Ես գիտեմ այդտեղ հավաքված բոլոր մարդկանց, գիտեմ, թե նրանք ինչի են հավաքվել, ինչի են ունակ, գիտեմ, թե ինչպես են նրանք, պարբերաբար, որպես հաճախորդ, հանդես եկել նույն Սերժ Սարգսյանի մոտ։ Չեմ բացառում, որ նրանցից շատերը հենց իր կողմից են գործուղվում Ազատության հրապարակ։ Մենք միամիտ չենք և թույլ չենք տա, որ որևէ մեկը մեզ բոլորիս թյուրիմացության մեջ գցի։ Հստակ պետք է հնչեցնել քաղաքական օրակարգը»,- ասաց Փոստանջյանը։
Նշենք նաև, որ այսօր Զարուհի Փոստանջյանը դատախազություն դիմում է ներկայացրել Սերժ Սարգսյանի դեմ պետական դավաճանության մեղադրանքով քրեական գործ հարուցելու համար։
Առավել մանրամասն՝ տեսանյութում։
