Հայաստան-Արցախ-Սփյուռք միասնության համակողմանի ամրապնդումը պետք է լինի համազգային նպատակների իրականացման առաջնահերթություններից: Այս մասին Կ. Դեմիրճյանի անվան մարզահամերգային համալիրում ապրիլի 9-ին ՀՀ Ազգային ժողովի հատուկ նիստի ժամանակ իր ելույթում հայտարարեց ՀՀ նորընտիր Նախագահ Արմեն Սարգսյանը:
«Հանուն համազգային նպատակների և այդ նպատակների իրականացման մեր առաջնահերթությունից պետք է լինի Հայաստան-Արցախ-Սփյուռք միասնության համակողմանի ամրապնդումը և նրա ներուժի առավել արդյունավետ իրացումը: Մեր ազգային միասնության ամենակարևոր գրավականն ու հենարանը եկեղեցին է՝ համաշխարհային, ազգային մի կառույց, որի շուրջ դարեր ի վեր համախմբվել է մեր ժողովուրդը: Պետք է անենք հնարավոր ամեն բան արհեստական հակասությունների վերացման և մեր հավաքականության իրական ուժի գիտակցման ուղղությամբ: Մշակենք համազգային խնդիրների լուծման և այդ լուծմանը ծառայող արդյունավետ նոր մեխանիզմներ, միացյալ օրակարգ, ընդհանուր պատասխանատվություն և միասնական ջանք: Վստահ եմ, մեկ օր առաջ հասնելու ենք այս բանաձևի ընկալմանը և կենսագործմանը: Փոքր երկիր, համաշխարհային ազգ՝ սա է մեր էությունը»,- հայտարարեց ՀՀ նորընտիր Նախագահը:
Նա ընդգծեց, որ հավատը, վստահությունը, արդարությունը և ամենօրյա բարեխիղճ աշխատանքն այն արժեքներն են, որ կարող են խթանել մեր հասարակության ստեղծագործական ուժն ու եռանդը: «Այսօրվա և վաղվա նկատմամբ հավատն ու վստահությունը, տնտեսությունն աշխուժացնելու նպատակով հստակ տեսլականն ու դրա շոշափելի արդյունքները կարող են ոչ միայն խթանել տնտեսական աճը, ներքին և արտաքին ներդրումների հոսքը, այլև արգելակել արտագաղթը: Առավել, հայրենիք վերադարձնել հայրենակիցներից շատերին:
Սակայն ինչքան էլ գրավիչ և տեսականորեն հիմնավոր լինեն լուսավոր ապագայի խոստումները, մարդիկ ուզում են իրենց առօրյայում՝ այսօր տեսնել դրանց պտուղները, և նրանք իրավացի են: Աշխարհը, ուր ապրում ենք մենք ու աշխարհը, ուր ապրելու են մեր երեխաները, փոփոխվում է շատ արագ, վերածվում մրցակցության հսկայական դաշտի: Մենք պետք է դրան պատրաստ լինենք, ներդրումներ անենք գիտության, նոր տեխնոլոգիաների, կրթության ու մշակույթի ոլորտներում, կապ հաստատենք աշխարհի լավագույն, գիտական կրթական և հետազոտական կենտրոնների հետ՝ արևմուտքից արևելք, հյուսիսից հարավ: Ներգրավենք նոր գաղափարներ, փոխառնենք լավագույն փորձն ու այս ամենի հիման վրա ստեղծենք մեր յուրօրինակ լուծումներն ու դրանք առաջարկենք աշխարհին: Վստահ եմ, որ մենք ի վիճակի ենք Հայաստանը դարձնել գրավիչ գործընկեր, նոր տեխնոլոգիաների և լուծումների կամուրջ Արևելքի ու Արևմուտքի միջև: Սա է ապագան»,- հայտարարեց Արմեն Սարգսյանը:
