Ֆրանսիական Total ընկերությունը մտադիր է Իրանի Հարավային Պարս գազի հանքի շահագործման թույլտվություն ստանալ, եթե նույնիսկ ԱՄՆ-ն այդ երկրի դեմ պատժամիջոցներ սահմանի։ Այս մասին «Էկո» պարբերականին տված հարցազրույցում հայտարարել է ընկերության ղեկավար Պատրիկ Պույանեն։
«Եթե հաջորդ ամիս նախագահ Դոնալդ Թրամփն Իրանի դեմ պատժամիջոցներ սահմանի, Total-ը մտադիր է գործել այնպես, ինչպես 1996-ի պատժամիջոցների պարագայում։ Այսինքն՝ փորձել ԱՄՆ կառավարությունից Հարավային Պարս նախագծի գործունեությունը պատժամիջոցների ռեժիմից ազատելու հատուկ թույլտվություն ստանալ»,-ասել է նա։
Պույանեի խոսքով՝ նման պարագայում ընկերությունը մի շարք համոզիչ փաստարկներ ունի։ Նախ, Հարավային Պարս նախագծի պայմանագիրը ստորագրվել է, երբ ԱՄՆ պատժամիջոցները դադարեցվել են, բացի այդ՝ գազը նախատեսված կլինի Իրանի ներքին շուկայի համար։
Սակայն նա խոսոտվանել է, որ եթե Total-ն ԱՄՆ-ից նման թույլտվություն չստանա, ստիպված կլինի հեռանալ Իրանից։
