Վերաքննիչ քրեական դատարանն անփոփոխ է թողել Փարսադան Փարսադանյանին արդարացնելու դատավճիռը, որ կայացրել էր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը Արմեն Խաչատրյանի նախագահությամբ:
Նախաքննական մարմինը 33-ամյա, խնամքին մինչև 14 տարեկան 3 երեխա ունեցող Փարսադան Փարսադանյանին մեղադրել էր կողոպուտի փորձ կատարելու համար:
Գործի դատական քննության ժամանակ պարզվել է, որ Փարսադանը տուժող ճանաչված Արշավիրին իմացել է Մոսկվայում արտագնա աշխատելու ժամանակից:
Այնտեղ երեք «խոպանչի» հայերով բնակարան են վարձել, պայմանավորվել, որ վարձը կիսովի են տալու, բայց Արշավիրը երկու ամսից ավելի ապրելով՝ մի ամսվա վարձ է վճարել ու առանց զգուշացնելու հեռացել է՝ վարձի գծով պարտք մնալով 10 հազար ռուբլի, իսկ նույն սենյակում բնակվող երրորդ հային պարտք է եղել ևս 5 հազար ռուբլի:
Արդեն Հայաստանում Փարսադանն ընկերոջ ու երկու կանանց հետ մեքենայով «Լուսաղբյուր» հյուրանոցի սաունան գնալու ճանապարհին, Ազատության պողոտայում մեկ ուրիշ մեքենայի ղեկին նկատել է «փախստակ» Արշավիրին:
Երկուստեք կանգնել են, ողջագուրվել, Փարսադանն Արշավիրին էլ է հրավիրել սաունա:
Վերջինս սիրահոժար համաձայնել է:
Բայց սաունայում, մինչև զվարճանքներին անցնելը, Փարսադանն Արշավիրին հիշեցրել է մոսկովյան պարտքը, առաջարկել է մարել այն, իսկ Արշավիրը հրաժարվել է: Ավելին, փախել ու նստել է իր մեքենան: Այդ ժամանակ Փարսադանը գնացել, բռնել է նրա օձիքից ու պարանոցի շղթայից և ասել. «Սենց ցեպեր ես կարողանում գցել, բայց պարտքերդ չես տալիս»:
Արշավիրը փախել է, ապա ոստիկանություն է դիմել՝ հայտնելով, թե Փարսադանը ձեռքը գցել է, որ իր շղթան պոկի, բայց շղթան չի պոկվել, ինքն էլ փախել է: Ահա այսպես Փարսադանը մեղադրվել է կողոպուտի փորձի համար:
Գործի քննության ընթացքում պարզվել է, որ Արշավիրի «թանկարժեք» շղթան եղել է ոչ թանկարժեք դեղին մետաղների համաձուլվածք, միջին շուկայական արժեքը՝ 10 հազար դրամ:
Ընդհանուր իրավասության դատարանը ամբաստանյալի մեղքը հաստատված չի գնահատել և արդարացրել է Փարսադան Փարսադանյանին:
Վերաքննիչ բողոք է բերել մեղադրանքի կողմը՝ պնդելով, թե մեղքը լավ էլ ապացուցված է, Փարսադանյանը պետք է դատապարտվի կողոպուտի փորձի համար:
Վերաքննիչ քրեական դատարանը մեղադրողի բողոքը չի բավարարել և անփոփոխ է թողել արդարացման դատավճիռը:
