Սկսվելու է դե ֆակտո իշխանության և հասարակության միջև սուր և հարաճուն առճակատման գործընթացը

«Առաջին լրատվական»-ի զրուցակիցն է ԼՂՀ նախկին արտգործնախարար Արման Մելիքյանը։

-Պարոն Մելիքյան, մենք այն ժամանակաշրջանում ենք, երբ պետք է հետընտրական զարգացումների մեջ լինեինք մինչև ապրիլի 9-ը։ Այդպես եղել է 20 տարվա մեջ բոլոր չորս նախագահական ընտրություններին։ Դուք, որ նաև նախագահի թեկնածու եք եղել, ըստ Ձեզ՝ լա՞վ է, թե՞ վատ, որ չկա ուղղակի ընտրություններ և հետընտրական զարգացումներ։

-Եթե հետընտրական զարգացում ասելով նկատի ունեք քաղաքացիների կողմից նախաձեռնված զանգվածային բողոքի ակցիաները, ապա դրանք ոչ թե նախագահական ընտրությունների հետ օրգանապես փոխկապակցված երևույթներ են, առանց որոնց այդ ընտրությունները տեղի ունենալ չեն կարող, այլ, իմ համոզմամբ, իշխանությունների կողմից ընտրական գործընթացների տոտալ կեղծման հետևանք: Այսինքն՝ ձեր ակնարկած հետընտրական գործընթացներից խուսափելու համար մեր դե ֆակտո իշխանությունները ոչ թե երկրի Սահմանադրությունը պետք է փոխեին, այլ, ընդամենը, պետք է հրաժարվեին ընտրակեղծարարության միջոցով իրենց «հաղթանակն» ապահովելու հակապետական գործելակերպից: Այժմ իշխանությունները կբախվեն արդեն ոչ թե մեկ-երկու շաբաթ ձգվող բողոքի փողոցային ակցիաները խաղաղությամբ չեզոքացնելու կամ ուժով ճնշելու անհրաժեշտությանը, այլ մեր ողջ հասարակության հետ անժամկետ սուր և հարաճուն առճակատման միանգամայն նոր մի իրավիճակի հետ: Ընդ որում՝ այժմ արդեն հայաստանյան իշխանությունների հանդեպ վերաբերմունքն ընդգծված բացասական է լինելու նաև Արցախում, ինչն աննախադեպ է` նախկինում արցախահայությունը գերազանցապես աջակցում էր Հայաստանի արցախցի բարձրագույն պաշտոնյաներին:

-Հետընտրական զարգացումների ելքը գրեթե միշտ բացասական հետևանք է ունեցել՝ հիասթափությունների ալիքը, արտագաղթի տեմպերն ավելի են մեծացել։ Հիմա հետընտրական զարգացումներ այլևս չեն լինելու։ Ըստ Ձեզ՝ կհաջողվի՞ իշխանությանը այս հանդարտ վիճակը պահպանել, թե՞ պայթյուն կլինի ներսից։

-Ինչպես արդեն ասացի, մեկ-երկու շաբաթ տևող զանգվածային բողոքների փոխարեն սկսվելու է դե ֆակտո իշխանության և հասարակության միջև սուր և հարաճուն առճակատման գործընթացը: Դե ֆակտո իշխանությունը միակողմանի որոշեց, որ կարող է անտեսել հասարակության պահանջներն ու մտահոգությունները և վերջինիս պարտադրել իր կամքը: Դա ճակատագրական սխալ է: Գալու է պահը, երբ այսօրվա իշխանավորները կիշխանազրկվեն` իրենց կաշվի վրա կզգան, թե ինչ բան է անօրինականությունն ու իրավական կամայականությունը, և այդ ժամանակ, իրենցից բացի, որևէ մեկին չմեղադրեն:

-Պարոն Մելիքյան, մեկ ամիս ժամանակ է մնացել վարչապետի ընտրությանը, հիմա առաջարկում են միավորվել Սերժ Սարգսյանի վերարտադրությունը թույլ չտալու համար Ինչպե՞ս եք գնահատում, որքանով հնարավոր է այս կարճ ժամանակահատվածում արդյունքի հասնել։

-Այս հարցի միանշանակ պատասխանը ես առայժմ չունեմ: Ամեն ինչ կախված կլինի նրանից, թե այս գործընթացը նախաձեռնող ուժերն ու անհատները որքանով ունակ կլինեն համախմբել հասարակությանն իրենց կողմից հռչակված նպատակի շուրջ, ինչպիսի ֆինանսական և մտավոր ռեսուրս կներգրավեն այդ նպատակին հասնելու համար: Կարևոր է հասկանալ, որ, անգամ եթե հասնեն այդ նպատակին, ապա դա կլինի գործի կեսը միայն: Շատ ավելի կարևոր է, թե ինչպես են տեսնում իրենց անելիքը դրանից հետո:

-Պարոն Մելիքյան, նախորդ շաբաթ ԱԺ-ն հաստատեց Կառավարության փոփոխության կազմի, ինչպես նաև Անվտանգության խորհրդի կազմի փոփոխությունը։ Անվտանգության կազմի փոփոխությունները, երբ նախագահը և ԱԺ նախագահը դուրս են մնացել խորհրդից, ինչպե՞ս եք գնահատում։ Արդյոք կա՞ մտահոգվելու առիթ։

-Հայաստանի պետական կառավարման համակարգի կառուցվածքը հարմարեցված է դե ֆակտո իշխանությունների պահանջներին ու ընթացիկ կարիքներին: Այդ իշխանությունները ոչ միայն չունեն իրական ներքին հենարան՝ հանձինս ՀՀ քաղաքացիների, այլև ուղղակիորեն օրենսդրորեն մերժել են այդպիսի հենարանի կարևորությունն ու անհրաժեշտությունը` ՀՀ քաղաքացիներին զրկելով երկրի պետական իշխանության ձևավորմանը լիարժեքորեն մասնակցելու հնարավորությունից: Այս պայմաններում, թերևս, ամենևին էլ կարևոր չէ, թե ովքեր են լինելու ԱԽ անդամներ` նրանք, բոլոր դեպքերում, չեն ներկայացնելու ՀՀ քաղաքացիներին:

Լուսանկարը՝ panorama.am-ի