Մաքսային միությանն անդամակցելը լուրջ խթան կդառնա հայաստանյան տնտեսության զարգացման համար: Այսօր տեղի ունեցած ասուլիսի ժամանակ այս մասին ասաց Հայրենական ապրանքարտադրողների միության նախագահ Վազգեն Սաֆարյանը՝ հավելելով, որ իր ասածի երաշխիքը ՄՄ անդամ երկրների 160 միլիոնանոց շուկան է:
«Հայաստանը պետք է ակտիվորեն աշխատանքներ իրականացնի այդ կառույցին անդամակցելու ուղղությամբ, քանի որ անդամությունից հետո հայկական ապրանքներն ու ծառայություններն առավել հեշտ կհասնեն ռուսական շուկա: Կհիմնվեն համատեղ նոր ձեռնարկություններ, զարկ կտրվի կոշկագործությանը, կենցաղային իրերի, տրիկոտաժի, բրդյա ապրանքների արտադրությանը, կզարգանան փոքր ու միջին բիզնեսները, որոնք Հայաստանում, ցավոք, գոյություն չունեն: Այն արտոնությունները, որ գործող նմանօրինակ ընկերություններին տալիս է կառավարությունը, ըստ էության, բավարար չեն: Այսօր պետք է սահմանվեն նոր արտոնություններ, մեծացվի ԱԱՀ-ի չհարկման շեմը»,- ասաց Վազգեն Սաֆարյանը:
Հայրենական ապրանքարտադրողների միության նախագահի խոսքով՝ Հայաստանի ու Ռուսաստանի տնտեսական շահերը համընկնում են, և այն, որ մեր երկիրը ՄՄ անդամ պետությունների հետ անմիջական սահմաններ չունի, դեռ ոչ մի բան չի նշանակում:
«Ապրանքների արտահանման համար կարող են օգտագործվել տարանցիկ սահմանները: Չեմ կարծում, որ Վրաստանն այս հարցում խոչընդոտ հանդիսանա: Սահմանային շփումները կհեշտացնի նաև երկաթգծի շահագործումը, ինչն այնքան էլ հեռու չէ»,- նշեց նա:
Վազգեն Սաֆարյանի համոզմամբ՝ տնտեսական ինտեգրացիայի առումով Հայաստանը նոր փուլ է թևակոխում: «Ռուսաստանն ունի ոսկու և տարադրամի, ինչպես նաև հզոր էներգետիկ պաշարներ: Նա, միաժամանակ, ունի գիտատեխնիկական մշակումներ, որը կարող է ապահովել Հայաստանը»,- նշեց Հայրենական ապրանքարտադրողների միության նախագահը:
