Նիսի հայ համայնքում երկար տարիներ տիրող անառողջ մթնոլորտը շարունակվում է մինչև այսօր։
Հիշեցնենք՝ Նիսի նախկին կրոնական ընկերակցությունը, որ Հայ առաքելական եկեղեցու գերագույն հոգևոր խորհրդի 2012թ. հունվարի 26-ի որոշմամբ՝ զրկվել է «Հայ առաքելական եկեղեցի» տիտղոսից, դատական հայց էր ներկայացրել 2010թ. սեպտեմբերի 19-ից Նիսի հոգևոր հովիվ Տ. Գրիգոր աբեղա Խաչատրյանի դեմ և տանուլ տվել: 2013 և 2017 թվականներին Նիս քաղաքի առաջին ատյանի դատարանը մերժել էր նույն քաղաքի կրոնական նախկին ընկերակցության դիմումները՝ հովվատնից վտարել հոգևոր հովիվ Տ. Գրիգոր աբեղա Խաչատրյանին, որը մեկ տարի առաջ համատեղության կարգով նշանակվել էր նաև Ֆրանսիայի Հայոց թեմի առաջնորդական ընդհանուր փոխանորդ։
Հայր Գրիգորը, որը ոչ միայն Նիսի հոգևոր հովիվն է, այլ համատեղությամբ նաև Ֆրանսիայի թեմի առաջնորդական ընդհանուր փոխանորդ, օրերս վերադարձել է Նիս և փոխված տեսել բոլոր փականքները։ «Առաջին լրատվական»-ի հետ զրույցում հայր Գրիգորը նշեց՝ չնայած նրան, որ կրոնական ընկերակցությունը երկու անգամ տանուլ էր տվել դատական հայցերը, իր բացակայությունից օգտվելով, փոխել է բոլոր փականքները, այդ թվում՝ անօրինական կերպով մուտք գործելով հովվատուն՝ այսպիսով հոգևորականին զրկելով իր բնակարան մուտք գործելու իրավունքից։
Հայր Գրիգորը նախորդ գիշեր ստիպված է եղել գիշերել փողոցում։
«Անցած շաբաթվա վերջին Նիսից ինձ լուր տվեցին, որ մյուս կողմի մարդիկ լուրեր են տարածում, որ իմ դեմ երրորդ անգամ դատ են բացել և շահել, ուստի ինձ վտարել են հովվատնից։ Երեկ եկա Նիս, և ով զարմանք՝ բոլոր փականքներն փոխել են, դրսի դարպասներինը նույնպես։ Պարսպի վրայով ցատկեցի և ստուգեցի, որ հովվատան, այսինքն՝ իմ բնակության վայրի փականքները ևս փոխված են։ Բացի այդ, նամակատուփս ևս անհետացել է։ Օրենքների կոպիտ խախտում են կատարել, քանի որ երկու անգամ՝ 2013, 2017 թվականներին դատարանը մերժել էր իրենց հայցերը իմ դեմ և վտարման ոչ մի խոսք չէր կարող լինել»,- հավելեց հայր Գրիգորը։
Նրա խոսքերով՝ տեղի ունեցածը ոչ թե քաղաքացիական, այլ քրեական օրենսգրքի դաշտում է, քանի որ անօրինական կերպով մուտք են գործել ուրիշի բնակարան։ Հիմա հայր Գրիգորը պատասխանի է սպասում արագացված դատի համար։
«Եվ ամենացավալին այն է, որ այս ամենը կատարվում է բանակցությունների ընթացքում, որով, կարծես, հասնում էինք խնդրի հանգուցալուծմանը։ Բայց դե սա իրենց ձեռագիրն է, և առաջին անգամը չէ, որ այսպիսի նենգ և ստոր քայլերի են դիմում»,- ասաց նա՝ հավելելով, որ, ցավոք, համայնքում անառողջ մթնոլորտը շարունակվում է։ Արտաքուստ բանակցություններ են համերաշխության հույսում բայց․․․»,-հավելեց նա։
Նա նշեց, որ ամիսը ամենաքիչը մեկ անգամ պարտադիր գալիս է Նիս, լինում է, որ ամիսը մի քանի անգամ է գալիս՝ եթե ուրիշ տեղեր պարտականություններ չի ունենում։
