«Ամերիկայի ձայնի» փոխանցմամբ՝ ԱՄՆ-ի ազգային պատկերասրահում բացվել է հայազգի հայտնի լուսանկարիչ Յուսուֆ (Հովսեփ) Քարշի ստեղծագործությունների ցուցահանդեսը, որի խորագիրն է «Յուսուֆ Քարշ. Ամերիկյան դիմանկարներ»:
Ցուցահանդեսն անցկացվում է երկու փուլով. մինչև հաջորդ տարվա ապրիլի 27-ն անցկացվող ցուցահանդեսը կազմված կլինի հայազգի լուսանկարչի այրի Էստրելիտա Քարշի կողմից թանգարանին նվիրաբերված 109 աշխատանքից, իսկ 2014 թվականի մայիսի 2-ից մինչև նոյեմբերի 2-ն անցկացվող ցուցահանդեսին կավելացվի Քարշի ևս 27 աշխատանք:
«Քարշը՝ մինչ հայրենիքը լքելը և Կանադայում բնակություն հաստատելը, որտեղ ինքն անցկացրել է իր կյանքի մեծ մասը, ականատես է եղել Հայոց ցեղասպանության մղձավանջին: Հնարավոր է, որ իր կյանքի վաղ շրջանում ապրած անզորության զգացումն իր համար գրավիչ էր դարձնում իշխանություն ունեցող մարդկանց»,- ասված է ամերիկյան «Վաշինգտոն Փոստ» պարբերականում հրապարակված հոդվածում, որը նվիրված էր հայազգի լուսանկարչի աշխատանքների ցուցահանդեսի բացմանը:
Հոդվածում նշված է նաև, որ, ի տարբերություն անցյալ տարի դիմանկարների վարպետ-լուսանկարիչ իր գործընկերների, Քարշը երբեք չէր փորձում իր աշխատանքների հերոսներին պատկերել վերջիններիս համար անհարմար պահերին, ինչի համար ինքը հաճախակի ենթարկվում էր քննադատության:
«Քարշը հայտի է որպես համակրող լուսանկարիչ, որը կարողանում էր արտացոլել իր աշխատանքներում պատկերված մարդկանց ամենալավ կողմերը»,- գրում է «Վաշինգտոն Փոստ»-ը:
ԱՄՆ-ի ազգային պատկերասրահում հայազգի լուսանկարիչ Յուսուֆ (Հովսեփ) Քարշի աշխատանքների ցուցահանդեսում ներառված են նրա հայտնի աշխատանքները՝ Մեծ Բրիտանիայի վարչապետ Ուինսթոն Չերչիլի, դերասանուհի Ջորջիա Օ՛Քիֆի, երգիչ Մերիեն Էնդերսոնի, դերասանուհի Գրեյս Քելիի, գործարար Էլիզաբեթ Արդենի և ԱՄՆ-ի առաջին տիկին Էլեոնոր Ռուզվելտի դիմանկարները:
