«Երկիր Ծիրանի» կուսակցությունը մարտի 4-ից սկսած անցկացնելու է հավաքներ և երթեր՝ համահայկական ընդվզումը կազմակերպելու համար: Մեկնարկը տրվելու է Գյումրի և Վանաձոր քաղաքներից, որտեղ կուսակցությունը կիրականացնի ընդվզման ակցիաներ։
«Սերժ Սարգսյանի վարչապետության դեմ դուրս գալը մի փոքր դրվագ է, մենք դուրս ենք գալիս ամբողջ համակարգի դեմ։ Այս ավտորիտար համակարգի բուրգի վերևում կանգնած է հենց ինքը՝ Սերժ Սարգսյանը և մենք միանշանակ, նրան դեմ ենք և չենք ներելու նրա ոճրագործությունները մեր ազգի նկատմամբ, բայց բացի սրանից , մենք գտնում ենք, որ այս համակարգը պետք է ամբողջությամբ տապալել և նոր համակարգ հիմնադրել»,- «Առաջին լրատվական»-ի հետ զրույցում նշեց «Երկիր Ծիրանի» կուսակցության նախագահ Զարուհի Փոստանջյանը՝ պատասխանելով հարցին, թե ո՞րն է այս նախաձեռնության նպատակը, դուրս եք գալիս Սերժ Սարգսյանի վարչապետությա՞ն դեմ։
Այս համատեքստում Փոստանջյանը նաև հավելեց․ «Շատ կարևոր է, որպեսզի յուրաքանչյուր քաղաքացի ինքը դառնա այս շարժման մասնակիցը, յուրաքանչյուրն ինքը պետք է առաջնորդի այս շարժումը, այլ ոչ թե ինչ-որ մեկը պետք է հրահանգներ իջեցնի և նրանք այդ հրահանգները կատարեն։
Առաջին հերթին մենք պետք է սկսենք Գյումրիից և Վանաձորից և հետո արդեն ընթացքը ցույց կտա, թե որ քաղաքներն են մեզ միանալու և շատ ենք կարևորում նաև այն հանգամանքը, որ տարբեր տեղերում ունենանք ինքնակառավարում և ինքնակազմակերպում, որպեսզի բոլորս դառնանք և առաջնորդներ, և մասնակիցներ այս համազգային շարժման»։
Վերջինս չբացառեց նաև, որ կիրականացնեն նստացույցեր ու զանգվածային բողոքի ակցիաներ։
Մանրամասները՝ տեսանյութում։
