«Որքանո՞վ է ընդհանրապես արդյունավետ երկկողմանի համաձայնագրի իրականացման գործընթացը։ Ես կարող եմ ասել՝ առայժմ բոլորովին արդյունավետ չէ»,- «Առաջին լրատվական»-ի հետ զրույցում նման տեսակետ հայտնեց Երևանի մամուլի ակումբի նախագահ Բորիս Նավասարդյանը։
Շարունակելով, Նավասարդյանը նշում է. «Մեր կողմից այնքանով, որքանով շատ հստակ հայտարարություն է եղել, որ մենք այդ հարցերով լրջորեն սկսելու ենք զբաղվել մայիս-հունիս ամիսներից։ Ինչ-որ տեղ Հայաստանը բավականին հստակ իր դիրքորոշումը ներկայացրել է։ Եվրամիությունից մենք պաշտոնական արձագանք չենք լսել։ Ինչքանով հասկանում եմ՝ եվրոպական կողմը շահագրգռված կլիներ, որ լուրջ երկխոսություն գոնե ճանապարհային քարտեզի վերաբերյալ սկսվի արդեն հունվարին, բայց երևի պետք է համակերպվենք նրա հետ, որ ավելի շուտ, քան մայիս-հունիս ամիսներին, որևէ լուրջ բան սպասել պետք չէ։ Կարծում եմ՝ Եվրամիությունը ևս համակերպվել է այդ մտքի հետ»,- ընդգծեց մեր զրուցակիցը։
Նավասարդյանն ընդգծում է՝ իր տվյալներով՝ Բրյուսելում հիմա աշխատանք է գնում այս համաձայնագրի իրականացման առաջին զեկույցի ուղղությամբ, և այդ զեկույցը մայիս-հունիս ամիսներից ավելի շուտ է լինելու. «Ինձ շատ հետաքրքիր է, թե ինչպիսի առաջընթաց այնտեղ կարելի է ներկայացնել՝ առաջընթացի բացակայության պարագայում»։
Բորիս Նավասարդյանի կարծիքով՝ սա պայմանավորված է Հայաստանում ապրիլին սպասվող ներքաղաքական իրադարձությունների հետ. «Մենք այսօր տեսնում ենք, որ տեղի են ունենում և՛ ստվերային, և՛ բաց գործընթացներ։ Եթե խոսենք ստվերային գործընթացների մասին, ապա բոլոր պետական կառավարման կառույցները հարմարեցվում են այնպես, որպեսզի շատ մեծ փոփոխություններ չլինեն՝ ո՛չ կադրային, ո՛չ էլ կառույցների առումով։ Այն կառույցները, որոնք գործում էին նախքան խորհրդարանական հանրապետությանն անցնելը, նրանք, գուցե վերափոխված, բայց շարունակեն աշխատել։Նույնը կարելի է ասել նաև օրենսդրական դաշտի մասին, թեև դա բաց պրոցես է՝ ինչպես միշտ, ամեն ինչ թողնվել է վերջին պահին, և բազմաթիվ օրենքները, որոնք պետք է քննարկվեին անմիջապես սահմանադրական հանրաքվեից հետո, այս վերջին շաբաթների ընթացքում են պատրաստվում և, բնականաբար, ամբողջ կառավարությունը կենտրոնացած է այդ օրինագծի վրա, և դժվար թե այդպիսի աժիոտաժային պայմաններում նրանք հնարավորություն ունենան հիշել, որ Հայաստանը համաձայնագիր է ստորագրել Եվրամիության հետ»։
Հարցազրույցն ամբողջությամբ՝ տեսանյութում։
