«Դեռևս հումորով ենք վերաբերում շարժական արագաչափերին։ ՃՈ-ն թերևս երկու հատ ունի դրանցից և ավելի շատ աղմուկ բարձրացնելով փորձում է ցույց տալ, որ քաղաքում շատ կան շարժական արագաչափեր»,-«Առաջին լրատվական»-ի հետ զրույցում ասաց Վարորդների իրավունքների պաշտպան, փաստաբան Արտակ Խաչատրյանը։
Նրա խոսքով, ըստ էության, ՃՈ-ն փորձում է կանխարգելիչ, վախեցնող միջոցներով ազդել վարորդների վրա, բայց արդյունքում մի տեսակ զավեշտալի վիճակ է ստեղծվել։
«Վարորդները որտեղ, ճանապարհի որ հատվածում կայանված մեքենա են տեսնում, որը թեկուզ անսարք վիճակում է, մոտենում են, որ տեսնեն՝ հնարավոր է, դա այն անտեսանելի արագաչափն է»,-հումորով ասաց փաստաբանը։
Մեր դիտարկմանը, թե շարժական արագաչափերի տուգանքները հնարավո՞ր է բողոքարկել դատարանում, քանի որ ըստ հնչող կարծիքերի այդ մեքենան զգուշացող որևէ նշան չունի, Խաչատրյանը պատասխանեց.«Օրինական կլինի տուգանքը, եթե աղբյուրը պարզվի։ Հակառակ դեպքում, եթե մենք էլ գնանք, կանգնենք ճանապարհի եզրին, հեռախոսով նկարենք և խախտումը տրամադրենք ոստիկանությանը, պետք է որ տուգանեն նրանց։ Բայց հարց՝ որ օրինական հիմքի վրա, որ չափումներով։ Այս դեպքում է նման խնդիր կա»,-նշեց վարորդների իրավունքների պաշտպանը։
