Վրաստանի խորհրդարանը հինգ օրինագծերից բաղկացած փաթեթ է գրանցել օրենքով գողերի և գողական աշխարհի անդամների դեմ պատժամիջոցների խստացման վերաբերյալ։
Գողական աշխարհին պատկանելը և օենքով գողի կարգավիճակում լինելը Վրաստանում քրեական հանցագործություն է համարվում 2005-ից։
Սկզբում գողական աշխարհին պատկանելու համար ազատազրկում էին 3-8 տարով՝ տուգանքով կամ առանց տուգանքի, իսկ օրենքով գողերին՝ 5-10 տարով՝ տուգանքով կամ առանց տուգանքի։
2006-ին այդ օրենքը խստացրեցին։ Այժմ անդամությունը դատապարտվում է 5-8 տարի ազատազրկման, իսկ օրենքով գողերին 7-10 տարի ազատազրկում է սպառնում։
Փետրվարին Վրաստանի կառավարությունը հայտարարեց գողական մենթալիտետի հետ պայքարի նոր ալիքի մասին։ Ըստ քրեական օրենսգրքում ներկայացված լրացումների, քրեական աշխարհին պատկանելիությունը կպատժվի 7-11 տարի ազատազրկմամբ, իսկ օրենքով գողերին 9-15 տարի ազատազրկում կսպառնա։
Բացի այդ, Վրաստանի քրեական օրենսգրքում կհայտնվեն նոր հոդվածներ. «Գողական հավաքի կազմակերպում կամ դրանում մասնակցություն», «Գողական համայնքի գործունեության աջակցություն», քրեորեն պատժելի կլինի նաև գողական աշխարհի ներկայացուցչին խնդրանքով դիմելը։
Փոփոխությունների են ենթարկվելու և լրացվելու նաև գողական աշխարհին վերաբերող հասկացությունները։
