Ճապոնիայի նախարարների կաբինետը ուրբաթ օրը հաստատել է ծրագիրը, որով երկրի բնակիչներին ցանկության դեպքում 70-ն անց տարիքում թոշակի անցնելու հնարավորություն է տրվում: Փաստաթղթում առաջարկվող միջոցառումները ենթադրաբար օրենսդրորեն կհաստատվեն 2020 ֆինանսական տարում, որպեսզի ինչ-որ չափով դադարեցնեն աշխատուժի պակասը Ճապոնիայում: Այս մասին հայտնում է Kyodo տեղեկատվական գործակալթյունը:
«Մենք պետք է այնպիսի հասարակություն կառուցենք, որում ցանկության և ֆիզիկական հնարավորությունների առկայության դեպքում կարողանան աշխատել և վարել ակտիվ կենսակերպ բոլոր սերունդների մարդիկ»,- այս կապակցությամբ կառավարության նիստին հայտարարել է Ճապոնիայի վարչապետ Սինձո Աբեն:
Այժմ երկրում թոշակներ են տրվում 65-ը լրացած քաղաքացիներին, միաժամանակ նրանք իրավունք ունեն ազատորեն թոշակի անցնելու ցանկացած ժամանակ՝ 60-70 տարիքում: Մինչև 65 տարեկանը թոշակի անցնելու ցանկացողները վճարվում են փոքր-ինչ կրճատված ծավալով, իսկ 65 տարեկանից հետո առաջարկվում է հավելում: Այժմ կառավարությունը մտադիր է թույլ տալ թոշակի անցնել նաև 70 տարեկանում՝ համապատասխանաբար ավելի բարձր վճարով: Ծրագիրը նաև արտոնություններ է նախատեսում այն մասնավոր ընկերությունների համար, որոնք 65 տարեկանից բարձր վարձու աշխատող մարդկանց համար պայմաններ կստեղծեն:
Իշխանությունները ելնում են նրանից, որ Ճապոնիայում տարեց մարդիկ հաճախ առանձնանում են առույգությամբ և նախանձելի առողջությամբ:
