Ընթացիկ տարին կմտնի պատմության ամենատաք տարիների տասնյակ, իսկ ընդհանուր կլիմայական իրավիճակն այնպիսին է, որ մարդկությունը ծովի մակարդակի բարձրացման հետևանքով ավելի հաճախ է բախվում եղանակային արտառոց երևույթների հետ, ինչպիսին էր «Հայան» փոթորիկը, որը պատուհասել է Ֆիլիպիններին: Այս մասին հայտնում է Reuters գործակալությունը:
Ինչպես նշվում է Համաշխարհային հիդրոօդերևութաբանական կազմակերպության զեկույցում, արհեստական ջերմոցային գազերի մեծացումը մթնոլորտում նշանակում է, որ ապագայում կլիմայի տաքացումն անխուսափելի է:
Համաշխարհային հիդրոօդերևութաբանական կազմակերպությունը հայտնել է, որ առաջին 9 ամիսների տվյալներով այս տարին նման է 2003-ին, իսկ 1850-ից կազմված ամենատաք տարիների վարկանիշային աղյուսակում 2013-ը կարող է գրավել 7-րդ տեղը:
Երկրի ու օվկիանոսի մակերևույթի միջին ջերմաստիճանը կազմում է 0,48 աստիճան՝ ըստ Ցելսիուսի, ինչը բարձր է 1961-1990 թթ. միջին ցուցանիշից:
