Հայաստանում Microsoft-ի ներկայացուցչության տնօրեն Գրիգոր Բարսեղյանն այսօր լրագրողների հետ հանդիպմանը հայտարարեց, որ այսօրվանից Հայաստանում պաշտոնապես հասանելի կլինի Office 365 ամպային ծառայությունը: Բանախոսի հավաստմամբ՝ այս ծրագիրը Microsoft-ի ռազմավարության կարևորագույն մասերից է, որը հասանելի է ինչպես անհատների, այնպես էլ փոքր, միջին և խոշոր բիզնեսի համար:
Պարոն Գրիգորյանը նշեց, որ տնային օգտագործողներին Office 365-ը տրամադրում է Microsoft Office Profesional Plus ծրագրային փաթեթը, Skype ծրագրով ամսական 60 րոպե միջազգային զանգերի հնարավորություն, SkyDrive ամպային ծառայության հավելյալ 20 GB պահեստային ծավալ. «Տնային փաթեթը մեկ բաժանորդագրությամբ հինգ համակարգչի համար է, իսկ ամսական բաժանորդագրությունն արժե երեք հազար դրամ»:
Ինչ վերաբերում է բիզնեսին, բանախոսն ասաց, որ նրանց համար հատուկ փաթեթներ են պատրաստվել, որի միջոցով հնարավոր կլինի օգտվել ժամանակակից Այ-Թի ծառայություններից, ստանալ հավելյալ ծառայություններ:
Ի դեպ, հատուկ առաջարկներ կան նաև կրթական հաստատությունների համար: Ծառայությունը տալիս է 99.9% երաշխիք՝ ապահովության և աշխարհագրական ցանկացած կետից հասանելիության համար:
Մինչև բաժանորդագրվելը հայաստանյան բաժանորդները կարող են չորս ամիս փորձնական օգտվել ծրագրի հնարավորություններից:
