«Քաղաքական մեծամասնությունը որևէ կերպ պատրաստ չէ իր անդամների նկատմամբ վարույթ սկսել և պատժել, ինչը հանգեցրել է անպատժելիության»։ Այդ մասին «Առաջին լրատվական»-ի հետ զրույցում ասաց ԱԺ «Ելք» խմբակցության պատգամավոր Էդմոն Մարուքյանը՝ անդրադառնալով էթիկայի ժամանակավոր հանձնաժողով ստեղծելու ԱԺ «Ելք» խմբակցության նախագծին ԱԺ պետաիրավական և մարդու իրավունքների պաշտպանության հանձնաժողովի կողմից բացասական եզրակացություն տալուն: Հիշեցնենք՝ այս նախագիծը վերաբերում էր ԱԺ պատգամավորներ Նիկոլ Փաշինյանի և Արտաշես Գեղամյանի միջև տեղի ունեցած միջադեպը քննելուն և կատարվածի մասին եզրակացություն ներկայացնելուն։
«Դա ուղերձ է բոլորին, որ բոլորդ էլ կարող եք հարձակվել մեկդ մյուսի վրա, բռունցքներով խփել և այլն։ Սա շատ վատ ուղերձ է, ուղղված խորհրդարանին և ընդհանրապես ընդդիմությանը։ Տեսեք՝ հիմնականում ընդդիմության վրա են հարձակվել, ոչ թե հակառակը»։
Անդրադառնալով հարցին՝ օրենքի նոր կարգավորումներով ՀՀ ոստիկանությունը, Ազգային անվտանգության ծառայությունը, Պետական պահպանության ծառայությունը և Պետական վերահսկողական ծառայությունը լինելու են վարչապետին ենթակա մարմիններ, Էդմոն Մարուքյանն ասաց, որ ֆեյք գործընթաց է ընթանում՝ ցույց տալու համար, թե խորհրդարանական կառավարման ենք անցնելու, իսկ նախագծերը բոլորովին այլ բանի մասին են վկայում։
«Այսօր այս նախագծերով արձանագրում ենք, որ սա կեղծ խորհրդարանական կառավարում է, չկա խորհրդարանական կառավարում։ Սա կիսանախագահականից էլ վատ կառավարում է, քանի որ կիսանախագահականի պարագայում ոստիկանությունն էլ ԱԱԾ-ն էլ, կառավարությանն առընթեր մարմիններ էին, հիմա լինելու են միայն վարչապետին ենթակա մարմիններ, մի մարդու ենթակա։ Կան նաև մի շարք կոմիտեներ՝ պետեկամուտների, ատոմային էներգիայի և մի շարք այլ կոմիտեներ, որոնք չեն մտնում որևէ նախարարության կառուցվածքի մեջ, հաշվետու չեն խորհրդարանին, մի դեպքում միայն վարչապետին են ենթարկվում, մյուս դեպքում՝ միայն կառավարությանը։ Խորհրդարանին երկու դեպքում էլ հաշվետու չեն»,- շեշտեց նա։
Էդմոն Մարուքյանի խոսքերով՝ եթե օրենքները այս տեսքով ընդունվեն, սահմանադրական ճգնաժամի առաջ ենք կանգնելու։
Մանրամասները՝ տեսանյութում։
