Այս տարի ԱՄՆ–ում գրիպի սեզոնը ավելի ինտենսիվ է, քան երբևէ, և իրավիճակը գնալով ավելի է վատթարանում,– հաղորդում են առողջապահության Դեպարտամենտից։
Հիվանդների քանակը աճում է ազգային մակարդակով։ Նաև աճում է հոսպիտալացվածների թիվը, մահացության կանխատեսումները նույնպես մխիթարիչ չեն։ Հիվանդությունների վերահսկողության և պրոֆիլակտիկայի կենտրոնի տվյալներով՝ այս տարի արդեն 34 միլիոն ամերիկացի է հիվանդացել գրիպով, ընդ որում՝ 710000-ը հոսպիտալացվել են, 56000-ը՝ մահացել։
Բժիշկները խորհուրդ են տալիս պատվաստվել գրիպի դեմ, չնայած որ արդեն միգուցե ուշ է։
Որոշ շրջաններում հակավիրուսային միջոցների, այդ թվում Տամիֆլյու դեղատեսակի դեֆիցիտ է։ Այս պահին առողջապահության կենտրոնական կոմիտեն զբաղվում է դեղերի մատակարարմամբ այն մասերում, որտեղ դրանց կարիքն ամենից շատ կա։
